කොරෝනා වසංගතය පැවති කාල සීමාව තුළ බලාත්මක කරන ලද අනිවාර්ය ආදාහන ප්‍රතිපත්තිය පිළිබදව මුස්ලිම් ප්‍රජාවගෙන් සමාව අයැද සිටින බව ජල සම්පාදන හා වතු යටිතල පහසුකම් සංවර්ධන අමාත්‍ය ජීවන් තොන්ඩමන් මහතා පවසනවා.
හැටන් නගරයේ පැවති ඉෆ්තාර් උත්සවයකට එක් වෙමින් ඊයේ (02) ජීවන් තොන්ඩමන් මහතා මේ බව සඳහන් කළා.
අමාත්‍යවරයා මෙහිදී තවදුරටත් පවසා ඇත්තේ ගෝඨාභය රාජපක්ෂ රජය තුළ සිදුවූ එම සිදුවීම සම්බන්ධයෙන් විධිමත් සමාව ඉල්ලා කැබිනට් පත්‍රිකාවක් ඉදිරිපත් කිරීමටද අපේක්ෂා කරන බවයි.
මේ සම්බන්ධයෙන් වැඩිදුරටත් අදහස් දැක්වූ ජල සම්පාදන හා වතු යටිතල පහසුකම් සංවර්ධන අමාත්‍ය ජීවන් තොන්ඩමන් මහතා,
“ජනාධිපති ගෝඨාභය රාජපක්ෂ මහතා යටතේ පැවැති රජය මෙම බලහත්කාරයෙන් භූමදානය කිරීමේ ප්‍රතිපත්තිය ගෙන ආවේ ලෝක සෞඛ්‍ය සංවිධානය ඇතුළු විද්‍යාත්මක මත කිහිපයක් ප්‍රතික්ෂේප කරමින්. කොරෝනා ආසදිත වීමෙන් මිය යන පුද්ගලයන් භූමදානය කිරීමෙන් පසුව ජල සැපයුම් දූෂිත විය හැකි බව පෙන්වා දෙමින් එවකට රජය විසින් එම ප්‍රතිපත්තිය අනුගමනය කිරීමට පෙළඹුණා.
කෙසේවෙතත්, ශ්‍රී ජයවර්ධනපුර විශ්වවිද්‍යාලයේ ප්‍රවීණයන් විසින් මෙහෙයවන ලද අධ්‍යයනයකින් සහ පේරාදෙණිය විශ්වවිද්‍යාලයේ ජල තාක්‍ෂණ ඒකාබද්ධ පර්යේෂණ හා ප්‍රදර්ශන මධ්‍යස්ථානය විසින් කරන ලද නව විද්‍යාත්මක සොයාගැනීම් මගින් මේ වන විට එලෙස කොරෝනා ආසාදිත දේහයක් භූමදාන නොකළ යුතු බවට අනුමනය කළ ප්‍රතිපත්තිය අභියෝගයට ලක් වෙලා තියෙනවා.”
