ජාත්‍යන්තර මුල්‍ය අරමුදල විසින් අනුමත කළ විස්තීර්ණ අරමුදල් පහසුකමේ සැකසුමට පාර්ලිමේන්තුවේ අනුමැතිය ලබා ගැනීම සඳහා ඉදිරිපත් කළ යෝජනාවට අමාත්‍ය මණ්ඩල අනුමැතිය හිමිව තිබෙනවා.
අද (18) පැවැති අමාත්‍ය මණ්ඩල තීරණ දැනුම් දීමේ මාධ්‍ය හමුවට එක්වෙමින් කැබිනට් ප්‍රකාශක අමාත්‍ය බන්දුල ගුණවර්ධන මහතා මේ බව ප්‍රකාශ කළා.
පසුගිය මාර්තු 22 වනදා මාස 48 ක කාලයක් සඳහා ජාත්‍යන්තර මුල්‍ය අරමුදල විසින් ඩොලර් බිලියන 2.9ක විස්තීරණ අරමුදල් පහසුකමක් ශ්‍රී ලංකාව සඳහා අනුමත කළා.
එහි පළමු වාරිකය ලෙස ඩොලර් මිලියන 333ක් අනතුරුව නිදහස් කරනු ලැබුවා.
මුදල්, ආර්ථික ස්ථායීකරණ සහ ජාතික ප්‍රතිපත්ති අමාත්‍යංශය විසින් අදාළ මූල්‍ය පහසුකම සඳහා පොරොන්දු පත්‍රය ද නිකුත් කළා.
එම අරමුදලේ පහසුකම සහ අනෙක් අදාළ ලේඛන ද 2023 මාර්තු 23 වනදා පාර්ලිමේන්තුවේ සභාගත කළ අතර එම මුල්‍ය පහසුකම සම්බන්ධයෙන් පාර්ලිමේන්තු මන්ත්‍රීවරුන්ගේ ස්ථාවරය තහවුරු කර ගැනීමට සහ එම ණය පහසුකමට අදාළ ප්‍රතිපත්ති ක්‍රියාමාර්ග නීති සම්පාදනයට ඇතුළත් කිරීම සඳහා අවශ්‍ය පියවර ගැනීමට පාර්ලිමේන්තුවේ අනුමැතිය ලබාගත යුතු වනවා.
