පොලිස්පති සී.ඩී. වික්‍රමරත්න මහතාට ජනාධිපති රනිල් වික්‍රමසිංහ මහතා විසින් සිව්වැනි වරටත් ලබාදුන් සේවා දිගුව ඒකමතිකව ප්‍රතික්ෂේප කිරීමට ආණ්ඩුක්‍රම ව්‍යවස්ථා සභාව තීරණය කර තිබෙනවා.
ඒ, ආණ්ඩුක්‍රම ව්‍යවස්ථා සභාව ඊයේ (18) රැස්වූ අවස්ථාවේදී ය.
එහිදී ඔවුන් ඒකමතිකව තීරණය කර ඇති ජනාධිපතිවරයා විසින් පොලිස්පති සී.ඩී. වික්‍රමරත්න මහතාට ලබාදුන් අවසන් සේවා දිගු දෙකම ප්‍රතික්ෂේප කරන බව ජනාධිපතිවරයා වෙත ලිඛිතව දැනුම් දීමටයි.
සී.ඩී. වික්‍රමරත්න මහතා විශ්‍රාම යාමට නියමිතව තිබුණේ 2023 මාර්තු 26 වනදා සිට වන අතර ඔහුට අවස්ථා 4කදී සේවා දිගු ලබාදීමට ජනාධිපතිවරයා කටයුතු කර තිබුණා.
කෙසේ වෙතත් මෙම සේවාදිගුව අවසන් වීමෙන් පසු වත්මන් පොලිස්පති සී.ඩී වික්‍රමරත්න මහතාට තවත් සේවා දිගුවක් ලබා දෙන්නේ ද එසේත් නැත්නම් නව පොලිස්පතිවරයෙකු පත් කරන්නේ ද නැද්ද යන්න සම්බන්ධයෙන් මේ දක්වාත් අවසන් තීරණයක් ගෙන නොමැති බවට වාර්තා වනවා.
පොලිස්පති ධුරය සදහා ජ්‍යෙෂ්ඨ නියෝජ්‍ය පොලිස්පතිවරුන් කිහිප දෙනෙකු සිටිය ද මහජන ආරක්ෂක අමාත්‍ය ටිරාන් අලස් මහතා විසින් ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් මහතා ගේ නම මීලග පොලිස්පති ධුරය සදහා නම් කිරීම හේතුවෙන් කිසියම් අර්බුදයක් මතු ව ඇති බව සඳහන්.
