කොළඹ නගරයට එක්වන නවතම සුපිරි හෝටල් සංකීර්ණය වන ITC Ratnadipa Colombo එළඹෙන සතියේ සිට ශ්රී ලංකාව තුළ අතිසුඛෝපභෝගී අත්දැකීමක් ලබා ගත හැකි හෝටල් අතරට එක් වෙනවා.
ජනාධිපති රනිල් වික්රමසිංහ මහතාගේ ප්රධානත්වයෙන් ITC Ratnadipa Colombo හෝටල් සංකීර්ණය 2024 අප්රේල් 25 වැනි දින විවෘත කිරීමට නියමිතයි.
එහි සමාරම්භක උත්සවය සඳහා අග්රාමාත්ය දිනේෂ් ගුණවර්ධන මහතා මෙන්ම ශ්රී ලංකාවේ ඉන්දීය මහ කොමසාරිස් සන්තෝශ් ජා මහතාද එක් වෙනවා.
කීර්තිමත් ඉන්දියානු සමාගමක් වන ITC Ltd හි පූර්ණ අනුබද්ධිත සමාගමක් වන WelcomHotels Lanka Ltd විසින් මෙම හෝටලය ඉදිකර තිබෙනවා.
මෙය ඉන්දියාවෙන් පිටත විවෘත කෙරෙන පළමු ITC හෝටලය වීමද විශේෂත්වයක්.
කොළඹ ගාලුමුවදොර අවකාශයට එක්වන මෙම සුපිරි හෝටලය, මෙරට පළමු වරට දැකගත හැකි AHASA ONE Sky Bridge නමින් හැඳින්වෙන අහස් පාලමකින්ද සමන්විත වෙනවා.