මීගමුව, ගල්කන්ද හංදිය ප්‍රදේශයේ 60 පුද්ගලයෙකුට වෙඩි තබා ඝාතනය කිරීමට යොදාගත් යතුරු පැදිය අද (11) දහවල් කටුනායක, අමන්දොළුව, අලුත් හේන පාරේ අතුරු මාර්ගයක දමා ගොස් තිබියදී මීගමුව කොට්ඨාස අපරාධ විමර්ශන අංශයේ නිලධාරීන් විසින් සොයාගෙන තිබෙනවා.
මෙම වෙඩි තැබීම ඊයේ (10) රාත්‍රී 7ට පමණ සිදු වී තිබූ අතර, ඉන් පැය දෙකකට පමණ පසුව මේ යතුරු පැදිය පිළිබඳ තොරතුරු මීගමුව කොට්ඨාස අපරාධ විමර්ශන ඒකකය වෙත ලැබී තිබුණා.
මීගමුව සහකාර පොලිස් අධිකාරී රත්නායක මහතාගේ උපදෙස් සහ අධීක්ෂණය යටතේ මීගමුව කොට්ඨාස අපරාධ විමර්ශන අංශයේ නිලධාරීන්, සීදුව පොලිසියේ නිලධාරීන් ද, රජයේ රස පරීක්ෂක දෙපාර්තමේන්තුවේ නිලධාරීන් ද මෙම ස්ථානයට පැමිණ පරීක්ෂණ සිදු කළහ .
එසේම එම යතුරු පැදියේ තිබූ ඇගිලි සළකුණු ඇසුරෙන විමර්ශන කටයුතු සිදු කළ අතර, වෙඩික්කරුවන් එම ස්ථානයේ යතුරු පැදිය දමා පළා ගොස් ඇති බව පොලිසිය විසින් අනාවරණය කර ගෙන තිබෙනවා.
