මීළඟ පොලිස්පතිවරයා කිසිදු චෝදනාවකට ලක් නොවූ ගෞරවනීය අයෙකු විය යුතු බව ශ්‍රී ලංකා නීතිඥ සංගමය සඳහන් කරනවා.
ජනාධිපති රනිල් වික්‍රමසිංහ මහතාට ව්‍යවස්ථා සභාවේ සියලු සාමාජිකයන්ට පිටපත් සහිතව මෙන්ම ලිපියක් යොමු කරමින් ශ්‍රී ලංකා නීතිඥ සංගමය මේ බව අවධාරණය කර තිබෙනවා.
මේ වන විට පොලිසිය කෙරෙහි මහජන විශ්වාසය බරපතල ලෙස බිඳ වැටී ඇති බැවින්, මීළඟ පොලිස්පතිවරයා පත් කිරීමේ දී ශ්‍රී ලංකා පොලිසිය කෙරෙහි මහජන විශ්වාසය යළි ඇති කිරීමට හැකි ආදර්ශමත් සහ කිසිදු කැළලක් නැති නිලධාරියෙකු පත් කළ යුතු බවත්, අපරාධ සම්බන්ධයෙන් චුදිතයන් ලෙස නම් කර ඇති අය හෝ මානව හිමිකම් කඩ කිරීම් සම්බන්ධයෙන් චුදිතයන් වී ඇති අය පත් නොකරන ලෙසත් ශ්‍රී ලංකා නීතිඥ සංගමය එම ලිපිය මගින් ඉල්ලා සිටිනවා.
ශ්‍රී ලංකා නීතිඥ සංගම වෙනුවෙන් එහි සභාපති ජනාධිපති නීතිඥ සාලිය පීරිස් මහතා සහ ලේකම් නීතිඥ ඉසුරු බාලපටබැඳි මහතා එම ලිපියට අත්සන් තබා තිබෙනවා.
