පාසල තුළදී දස හැවිරිදි බාල වයස්කාර දැරියක් දූෂණය කිරීමේ චෝදනාව මත මන්නාරම සෙල්වනගර් ප්‍රදේශයේ පාසලක විදුහල්පතිවරයෙකුට බරපතල වැඩ සහිතව වසර හතක සිර දඬුවමක් මන්නාරම මහාධිකරණ විනිසුරු එම්.එම්.එම් මිහාල් විසින් ඊයේ (11) නියම කර තිබෙනවා.
ඊට අමතරව රුපියල් 25000ක දඩ මුදලක්ද, රුපියල් ලක්ෂයක වන්දියක්ද, දැරියට ගෙවන ලෙස විනිසුරුවරයා නියෝග කර තිබෙනවා.
2014 සැප්තැම්බර් 23 වැනි දින මන්නාරම පාසලක 10 හැවිරිදි සිසුවියක් දූෂණය කළ බවට ලද පැමිණිල්ලකට අනුව මන්නාරම පොලීසිය අදාල විදුහල්පතිවරයා අත්අඩංගුවට ගෙන මන්නාරම අධිකරණය වෙත ඉදිරිපත් කර තිබුණා.
දැරිය දූෂණය කිරීමේ සිද්ධිය දැරියගේ කට උත්තරය හා අධිකරණ වෛද්‍ය වාර්තාව හා තවත් විද්‍යාත්මක සාධක මත පැහැදිලිව ඔප්පු වී තිබු අතර විත්තිකාර විදුහල්පතිවරයා එම චෝදනාව තමන් විසින් සිදු කරන ලද බවට ප්‍රකාශයක් කරමින් අධිකරණයෙන් සමාව ඉල්ලා තිබෙනවා.
එමෙන්ම මහාධිකරණ විනිසුරුවරයා තීන්දුව ප්‍රකාශ කිරීමත් සමගම චූදිත විදුහල්පතිවරයා තමන්ව නිදහස් කරන ලෙසද ආයාචනා කොට තිබෙනවා.
