විශ්රාමික හමුදා නිලධාරීන් නීතිවිරෝධි ලෙස රුසියාවේ හමුදා රැකියා සඳහා යැවීම සම්බන්ධයෙන් චෝදනා එල්ලවී ඇති සැකකරුවන් 05 දෙනා ලබන 30 වනදා දක්වා රක්ෂිත බන්ධනාගාරගත කර තිබෙනවා.
විශ්රාමික හමුදා මේජර්වරයින් දෙදෙනෙක් සහ එම සිද්ධියට සම්බන්ධ තවත් පුද්ගලයින 03 දෙනෙකු මෙලෙස අද (16) මීගමුව අධිකරණය වෙත ඉදිරිපත් කිරීමෙන් අනතුරුව මෙම නියෝගය නිකුත් කර තිබුණා.
සැකකරුවන් මීගමුව අධිකරණය වෙත රැගෙන එන අවස්ථාවේදී වින්දිතයින්ගේ ඥතීන් විසින් මීගමුව අධිකරණය ඉදිරිපිටදී නිහඬ විරෝධතාවයක නිරත වී තිබුණා.
රුසියානු හමුදාවේ සේවය සඳහා ශ්‍රී ලාංකිකයින් යොමු කළ බලපත්‍ර ලාභී විදේශ රැකියා නියෝජිතායතනයක හිමිකරු හා එහි කළමනාකරු විදේශ සේවා නියුක්ති කාර්යාංශයේ විශේෂ විමර්ශන අංශයේ නිලධාරීන් විසින් ඊයේ දින (15) අත්අඩංගුවට ගෙන තිබුණා.
සංචාරක වීසා මගින් රුසියානු හමුදාවේ සිවිල් සේවය සඳහා ශ්‍රී ලාංකිකයින් යොමුකරන බව පවසා එක් අයෙකුගෙන් රුපියල් ලක්ෂ 15 බැගින් මුදල් අයකර විදේශගත කර ඇති අතර, එරටදී රුසියානු – යුක්‍රේන යුද්ධයේ යුද පෙරමුණට යාමට මෙම ශ්‍රී ලාංකිකයින්ට සිදුවී තිබුණා.
මෙම ඒජන්සි ආයතනය විසින් සිදුකළ මෙම ජාවාරම සම්බන්ධයෙන් කාර්යාංශයට පැමිණිලි 7ක් ලැබී ඇති අතර, එම පැමිණිලිවලට අනුව මෙම ආයතනය වංචා කර ඇති මුදල් ප්‍රමාණය රුපියල් කෝටියකට අධික බවයි වාර්තා වන්නේ.
