නාරාහේන්පිට අභයාරාමයේ විදුලි බිල රුපියල් එකොළොස්දහසක හිඟයක් තිබීම හේතුවෙන් කිසිදු පෙර දැනුම් දීමකින් තොරව පසුගිය සිකුරාදා (01) විදුලිය විසන්ධි කිරීමට විදුලිබල මණ්ඩලය පියවර ගෙන තිබෙනවා.
විහාරාධිපති මුරුත්තෙට්ටුවේ ආනන්ද නාහිමියන් විහාරස්ථානයේ නොමැති අවස්ථාවක මෙලෙස විදුලිය විසන්ධි කර ඇති බවයි වාර්තා වන්නේ.
එය දැනගත් දායක සභාවේ පුද්ගලයකු හිඟ විදුලි බිල හා දඩය වූ රුපියල් තුන්දහසක් ගෙවා එදිනම විදුලි සබඳතාව ලබාගත් බවත් ආනන්ද නාහිමියන් පවසනවා.
මෙම විදුලිය විසන්ධි කිරීම විදුලිබල මණ්ඩලයේ අනුමත නීතිරිතිවලට පටහැනි බැවින් ඒ පිළිබඳව පරික්ෂණයක් සිදුකරන ලෙස උන්වහන්සේ විදුලිබල මණ්ඩලයේ බලධාරින්ගෙන් ඉල්ලීමක්ද කර තිබෙනවා.
විදුලිය විසන්ධි කිරීමට පෙර අදාළ පාරිභෝගිකයා දැනුවත් කළ යුතු වන අතර හිඟ විදුලි බිල අයකර ගැනීමට රතු නිවේදන නිකුත් කළ යුතු වුවද ඒ කිසිදු කාර්යයක් මෙම විසන්ධි කිරීමට පෙර සිදුව නොමැති බවයි සඳහන් වන්නේ.
එමෙන්ම විදුලිය විසන්ධි කළ හැක්කේ රුපියල් පන්දහසට වැඩි හිඟ බිල් පත් සම්බන්ධයෙන් වුවත් අභයාරාමයේ මෙම හිඟ මුදල විදුලි මීටර් තුනක හිඟයක් බැවින් එහිදී මෙම විසන්ධිය විදුලිබල මණ්ඩලයේ අනුමත නීතිරීති උල්ලංඝනය කිරීමක් බවද උන්වහන්සේ සඳහන් කරනවා.
වැඩබලන පොලිස්පති දේශබන්දු තෙන්නකෝන් මහතාට සහය දක්වමින් මුරුත්තෙට්ටුවේ ආනන්ද හිමියන් පසුගියදා ප්‍රවෘත්ති සාකච්ඡාවක්ද පැවැත්වූවා.
එහිදී කාදිනල් හිමියන්ට අපහාස වන අන්දමේ ඡායාරූපද ප්‍රදර්ශනය කළ උන්වහන්සේ කාදිනල් හිමියන් දේශබන්දු තෙන්නකෝන්ගේ පත්වීමට විරෝධය පලකිරීම පිළිබදව දැඩිව විවේචනයටද ලක්කළා.
