විමල් වීරවංශ ඇමතිතුමා විසින් කර තිබෙන ප්‍රකාශයේ යම් සාධනීය වැදගත්කමක් තිබෙන බව පූජ්‍ය මහාචාර්ය මැදගොඩ අභයතිස්ස ස්වාමීන් වහන්සේ පවසනවා.
උන්වහන්සේ මේ බව සඳහන් කළේ ඊයේ (10) කොළඹදී මාධ්‍ය වෙත අදහස් දක්වමින්.
ගෝඨාභය රාජපක්ෂ මහතා ජනාධිපතිවරයා වශයෙන් කටයුතු කළද දේශපාලනික වශයෙන් යම් කිසි මෙහෙයවීමක් සිදුකිරීමට අවශ්‍ය වන හෙයින් පක්ෂයේ ඉහළ තනතුරක් තිබීම වැදගත් බවයි උන්වහන්සේ පවසන්නේ.
මෙහිදී වැඩිදුරටත් අදහස් දැක්වූ මැදගොඩ අභයතිස්ස හිමි,
”විමල් වීරවංශ ඇමතිතුමාට පෞද්ගලිකව අදහස් දැක්වීමේ අයිතිය තියෙනවා. අනිත් එක එතුමා ඒ කියපු කතාවේ සාධනීය වැදගත්කමක් තියෙනවා. මොකද ගෝඨාභය රාජපක්ෂ ජනාධිපතිතුමා ජනාධිපති පුටුවේ හිටියත් එතුමාට දේශපාලනික වශයෙන් අවශ්‍ය වෙනවා යම්කිසි මෙහෙයවීම සිද්ධ කරන්න. ඒ නිසා එතුමාට දේශපාලනිකව පක්ෂයේ කිසියම් උසස් තනතුරක එතුමා සිටීම වැදගත් කියන එක අපිත් විශ්වාස කරන කාරණයක්. ඊටත් වඩා මෙතන තියෙන වැදගත්ම දේ මේකයි අතීතයේ අපි දැක්කා දුටුගැමුණු සද්ධාතිස්ස දෙකුමරුවන් අතර ඇතිවෙච්ච අරගලයේදී මහා සංඝ රත්නය මැදිහත් වෙන්නේ ඔවුන්ගේ සමඟිය රටේ යහපතට හේතුවෙන නිසා.
ඒ නිසා පක්ෂ අභ්‍යන්තරයේ ඇතිකරගන්නා වූ යම් යම් ගැටළු විසින් මේ රටේ තීරණාත්මක යම් කරණාවලදී බලපෑම් ඇතිකරන්න පුළුවන. හැත්තෑ දෙකේ තුනෙන් දෙකක බලයක් එක්ක ආපු මැතිණිය පක්ෂ අභ්‍යන්තරයේ ඇති වුන ගැටුම් නිසා අන්තිමට අසන 08ට බැහැලයි පරාජයට පත්වුණේ. සතුරාගේ උපක්‍රමය තමයි ජනතාවාදී රාජ්‍යයක් බිහිවුණාට පස්සේ අභ්‍යන්තර ගැටුම් හදන එක. ඒ නිසා මේ සුළු සිද්ධියක්,සුළු වචනයක් පදනම් කරගෙන අභ්‍යන්තර ගැටළු හදාගෙන ඒ හරහා මේ රටේ අනාගතය තීරණය කරන මේ ගමන නතර කරගන්න එපා කියන එක විශේෂයෙන් සිහිපත් කරනවා.”
මෙහිදී මහින්ද රාජපක්ෂ මහතා පරිණත දේශපලකයෙක් ලෙසත් ගෝඨාභය රාජපක්ෂ මහතා පරිණත පරිපාලකයෙක් ලෙසත් විවේක බුද්ධියෙන් කටයුතු කරන්නෙක් ලෙසත් පෙන්වා දෙන උන්වහන්සේ ආණ්ඩුවේ සිටින බහුතරක් ඇමතිවරුන්ද පරිණත දේශපාලකයින් ලෙස පෙන්වා දෙනවා. කිහිපදෙනෙකුගේ නොසරුප් කතා පසෙක දමා රට හමුවේ පවතින අභියෝග ජයගැනීමට රට වෙනුවෙන් සමඟියෙන් කටයුතු කළ යුතු බවයි උන්වහන්සේ වැඩිදුරටත් පෙන්වා දෙන්නේ.
