කොළඹ ප්‍රදේශ කිහිපයක අද (19) දිනයේ පැවැත්වීමට සැලසුම් කර තිබූ තිලීපන් සැමරුම් උත්සවයක් වළක්වාලමින් කොටුව මහෙස්ත්‍රාත් අධිකරණය විසින් වාරණ නියෝගයක් නිකුත් කර තිබෙනවා
ක්‍රිස්තියානි සහයෝගීතා ව්‍යාපාරය සහ මාරිමුත්තු සත්‍යවේල් පියතුමා ඇතුලු එම සැමරුම් උත්සවය සඳහා සහභාගී වන සියලුදෙනා වෙත අධිකරණය මෙම නියෝගය නිකුත් කර ඇති බවයි වාර්තා වන්නේ.
අධිකරණ ආරංචි මාර්ග පවසන්නේ කොටුව පොලීසිය විසින් අධිකරණය වෙත කළ කරුණු දැක්වීමකින් අනතුරුව මෙම නියෝගය නිකුත් කර ඇති බවයි.
ඒ අනුව කොටුව, කොම්පඤ්ඤවීදිය සහ කොල්ලුපිටිය පොලිස් වසම් තුළ පොදු මහජනතාවට පීඩාවක් වන අයුරින් අද දහවල් 12සිට රාත්‍රී 10 තෙක් සැමරුම් උත්සව හෝ පූජාවන් වළක්වාලමින් අධිකරණය මෙම නියෝගය නිකුත් කර තිබෙනවා.
මේ අතර මරදාන පොලිස් වසම ආශ්‍රිතවද අද හවල් 12 සිට පැය 24 ක කාලයක් තිලීපන් සැමරුම් තහනම් කරමින්, අධිකරණ නියෝගයක් ලබා දී තිබෙනවා.
