ශ්‍රී ලංකාව තුළ අන්තවාදී මත පැතිරවීම සහ අන්තර්ජාලය හරහා අන්තවාදී ක්‍රියාකාරකම් සඳහා මුදල් එකතු කළ පුද්ගලයින් දෙදෙනෙකු අත්අඩංගුවට ගැනීමට ත්‍රස්ත ක්‍රියා විමර්ශන ඒකකය කටයුතු කර තිබෙනවා.
මාතලේ සහ මඩකලපුව යන ප්‍රදේශවලදි එම පුද්ගලයින් දෙදෙනා අත්අඩංගුවට ගත් බව පොලිස් මාධ්‍ය ප්‍රකාශකවරයා සදහන් කරනවා.
46 හැවිරිදි වියේ පසුවන මාතලේ ප්‍රදේශයෙන් අත්අඩංගුවට ගත් පුද්ගලයා එක්සත් අරාබි එමීර් රාජ්‍යයයෙන් පිටුවහල් කළ අයෙක්.
අන්තවාදී ත්‍රස්ත කල්ලි නායක මොහොමඩ් සහරාන්ගේ සමීපතමයෙකු බවට පැවසෙන මොහු එක්සත් අරාබි එමිර් රාජ්‍යයේ සිටියදී අන්තර්ජාලය හරහා අන්තවාදී දේශන පවත්වා ඇති අතර රට තුළ අන්තවාදී ත්‍රස්තවාදී ක්‍රියාකාරකම් සිදු කිරීම සඳහා එක්සත් අරාබි එමිර් රාජ්‍යයේ දී මුදල් එකතු කිරීමක් ද සිදු කර ඇති බවට තොරතුරු වාර්තා වන බවයි පොලීසිය සදහන් කරන්නේ.
ඊට අමතරව මඩකලපුව කාත්තන්කුඩි කාත්තාන්කුඩි ප්‍රදේශයේදී 49 හැවිරිදි තවත් පුද්ගලයකු අත්අඩංගුවට ගැනීමට ත්‍රස්ත ක්‍රියා විමර්ශන ඒකකය කටයුතු කර තිබෙනවා.
මෙතෙක් කරන ලද පරීක්ෂණවලදී හෙළි වී ඇත්තේ මෙම පුද්ගලයා සිය මුහුණු පොත හරහා පාස්කු ප්‍රහාරය සාධාරණීකරණය කිරීමට සහ එවැනි ක්‍රියාකාරකම් ප්‍රවර්ධනය කර ඇති බවයි.
අදාළ සැකකරවන් දෙදෙනා මේ වන විට කොළඹ ත්‍රස්ත ක්‍රියා විමර්ශන ඒකකය වෙත රැගෙනවිත් ඇති අතර ඔවුන් දෙදෙනා රඳවා තබාගැනීමේ නියෝග මත තවදුරටත් ප්‍රශ්න කිරීමට නියමිත බව පොලිස් මාධ්‍ය ප්‍රකාශක නියෝජ්‍ය පොලිස්පති අජිත් රෝහණ මහතා සඳහන් කරනවා.
මීට පෙරද අන්තවාදී මත පැතිරූ බවට වන චෝදනාව මත පුද්ගලයෙක් ත්‍රස්ත විමර්ශන ඒකකය විසින් අත්අඩංගුවට ගෙන තිබුණා.
