පාස්කු ඉරුදින ත්‍රස්ත ප්‍රහාරයට යුක්තිය ඉටුකරන්නැයි බලකරමින් මෙරට කතෝලික සභාව අද (07) දින කළු ඉරිදාවක් ලෙස ප්‍රකාශයට පත් කර තිබුණා.
ඒ අනුව ඊට සහය දක්වමින් මෙරට කිතුණු ජනතාව කළු ඇඳුමින් සැරසී දිවයින පුරා පිහිටි කතෝලික දේවස්ථානවල දේව මෙහෙයන්ට සහභාගී වී සිටියා.
දේවමෙහෙයන්ගෙන් අනතුරුව පිටතට පැමිණි කතෝලික ජනතාව පාස්කු ප්‍රහාරයේ වින්දිතයන්ට යුක්තිය ඉල්ලා නිහඬ විරෝධතාවයක්ද දක්වා තිබුණා.
2019 අප්‍රේල් 21 වැනිදා පාස්කු ඉරුදින ත්‍රස්ත ප්‍රහාරය සම්බන්ධයෙන් පත් කළ ජනාධිපති කොමිසම සිය අවසන් වාර්තාව පසුගිය දා භාරදුන් අතර හිටපු ජනපති, හිටපු ආරක්ෂක ලේකම්, හිටපු පොලිස්පති, බුද්ධි අංශ ප්‍රධානීන් ඇතුළු පිරිසකට අපරාධ චෝදනා ගොනුකිරීම සහ තවත් නිර්දේශ රැසක් එහි ඇතුළත් වුණා.
කෙසේ වෙතත් ප්‍රහාරය සම්බන්ධයෙන් මෙතෙක් විධිමත්ව යුක්තිය ඉටුවීමක් සිදුව නොමැතිවීම නිසාවෙන් මාර්තු මස 07 වැනිදා ඉරුදින කළු ඉරිදාවක් ලෙස නම් කිරීමට කතෝලික අගරදගුරු පදවිය තීරණය කර තිබුණා.
