මැදවච්චිය, තුලාවේලිය ප්‍රදේශයේ පදිංචි පුද්ගලයකුට පහරදී තුවාල සිදුකිරීම සම්බන්ධයෙන් තොරතුරු සටහන් පොතේ පැවති සටහනක් වෙනස්කර කූඨ ලේඛන සකස් කළ බව කියන පොලිස් සැරයන්වරු දෙදෙනෙක් අත්අඩංගුවට ගෙන තිබෙනවා.
අපරාධ පරීක්ෂණ දෙපාර්තමේන්තුව පවසන්නේ කැබිතිගොල්ලෑව පොලීසිය අනුයුක්තව රාජකාරියේ යෙදී සිටි සැරයන්වරු දෙදෙනෙක් මෙලෙස අත්අඩංගුවට ගෙන ඇති බවයි.
මෙම සැරයන්වරුන් දෙදෙනා ඉකුත් අප්‍රේල් මස 7 වැනි දින මැදවච්චිය පොලිසියට අනුයුක්තව රාජකාරී කරමින් සිට තිබෙනවා.
අපරාධ පරීක්ෂණ දෙපාර්තමේන්තුව අනාවරණය කරගෙන ඇත්තේ, එහිදී ඔවුන් දෙදෙනා පුද්ගලයකුට පහරදී තුවාල සිදුකිරීමේ සිද්ධියක් සම්බන්ධයෙන් තොරතුරු සටහන් පොතේ පැවැති සටහන වෙනස්කර ඇති බවයි.
එමෙන්ම එම වෙනස් කිරීම්වලට අනුව එම නිලධාරීන් දෙදෙනා විසින් කූඨ ලේඛන ද සකස් කර ඇති බව සිදුකළ විමර්ශනවලින් අනාවරණය වී ඇති බව අපරාධ පරීක්ෂණ දෙපාර්තමේන්තුව තවදුරටත් සඳහන් කරනවා.
