සෙවණගල සීනි සමාගමේ කාපට් මැෂින් දෙකක් හොරකම් කර පරණ යකඩවලට විකුණා තිබියදී එහි ආරක්ෂක අංශය විසින් සොයා ගෙන සෙවණගල පොලිසියට භාර දී ඇති බව වාර්තා වනවා.
සෙවණගල සීනි සමාගමේ කාපට් මැෂින් දෙක වෘත්තීය සමිති නායකයකු බව කියන පුද්ගලයකු රැගෙන ගොස් ඇඹිලිපිටියේ පිහිටි පරණ යකඩ බඩු මිලට ගන්නා සමාගමකට විකුණා රුපියල් 535,000ක මුදලක් ලබාගෙන ඇති බව සෙවණගල පොලිසිය කළ පරීක්ෂණවලදී තොරතුරු හෙළිවී තිබෙනවා.
මැෂින් දෙක ප්‍රවාහනය කළ ට්‍රැක්ටර් රියදුරු සෙවනගල පොලිසිය විසින් අත්අඩංගුවට ගෙන තිබෙනවා.
මෙම සිද්ධිය සම්බන්ධයෙන් චෝදනා ලැබ සිටින වෘත්තීය සමිති නායකයා අත්අඩංගුවට ගැනීමට කටයුතු කරන බව පොලිසිය පවසනවා.
මේ පිළිබඳව සෙවණගල සීනි සමාගමේ නිලධාරින් පැවැසුවේ ඔහු පිළිබඳව සමාගම වෙනම පරීක්ෂණයක් පවත්වන බවයි.
වෘත්තීය සමිති නායකයාගේ වැඩ තහනම් කර ඇති බවද වාර්තා වනවා.
