පසුගිය ඉරිදා මුම්බායි නගරයේ පිහිටි බොලිවුඩ් නළු සල්මන් ඛාන්ගේ නිවසට වෙඩිතැබීමේ සිද්ධිය සම්බන්ධයෙන් එරට පොලීසිය විසින් සැකපිට දෙදෙනෙකු අත්අඩංගුවට ගෙන තිබෙනවා.
ඉන්දීය මාධ්ය වාර්තා කළේ, ඊයේ (15) සවස ගුජරාට් ප්රාන්තයේ බුර්හි දී මෙම සැකකරුවන් දෙදෙනා අත්අඩංගුවට ගෙන ඇති බවයි.
සොරාගත් යතුරුපැදියකින් පැමිණි මෙම සැකකරුවන් දෙදෙනා පසුගිය ඉරිදා අලුයම 5.00ට පමණ මුම්බායි නගරයේ පිහිටි බොලිවුඩ් නළු සල්මන් ඛාන්ගේ නිවස වෙඩි ප්රහාරයක් එල්ල කර පළාගොස් තිබුණා.
මෙම සැකකරුවන් දෙදෙනාම කුප්රකට ලෝරන්ස් බිස්නෝයි කල්ලියේ සාමාජිකයින් බවයි විදෙස් මාධ්ය වැඩිදුරටත් වාර්තා කර ඇත්තේ.
බිෂ්නෝයි කල්ලියට ඉන්දියාවේ ප්රසිද්ධ චරිත කිහිපයක ඝාතන සිද්ධීන්වලටද චෝදනා එල්ලවී තිබුණා.
සල්මන් ඛාන්ගේ නිවසින් පිටත සිදුවූ වෙඩි තැබීමේ සිද්ධියෙන් පසුව, ලෝරන්ස් බිස්නෝයිගේ සහෝදරයා වන අන්මෝල් බිස්නෝයි සමාජ මාධ්ය සටහනකින් වගකීම භාරගෙන, එය “පෙරදසුනක්” ලෙස විස්තර කර බොලිවුඩ් නළුවාට අනතුරු ඇඟවීමක් ද සිදුකර තිබුණා.
මෙම වෙඩි තැබීමේ සිද්ධියේ පසු සල්මන් ඛාන්ගේ ආරක්ෂක කණ්ඩායමට තවත් පිරිසක් එක් කිරීමට පොලිසිය කටයුතු කර ඇති බවයි වාර්තා වන්නේ.
ඔහුට නිවසින් පිටතට යාමට පෙර මුම්බායි පොලිසියට දන්වන ලෙස ද දන්වා ඇති අතර, අත්යවශ්යම කාරණාවකට හැර නිවසින් පිටතට නොයන ලෙසට ද සල්මන්ට උපදෙස් ලබා දී තිබෙනවා.