මුර සංචාර , මත්ද්‍රව්‍ය වැටලීම් හා රථ වාහන රාජකාරිවල නියැලෙන පොලිස් නිලධාරීන් පිළිබඳව අපරාධකරුවන් දැනුවත් කළ බව කියන සැකකරුවන් දෙදෙනෙකු රක්ෂිත බන්ධනාගාර ගත කර තිබෙනවා.
පොලිස්පතිවරයාට ලද තොරතුරක් අනුව අපරාධ පරීක්ෂණ දෙපාර්තුමේන්තුවේ පරිගණක අපරාධ විමර්ශන ඒකකය මඟින් මෙම සැකකරුවන් අත්අඩංගුවට ගෙන අධිකරණයට ඉදිරිපත් කර තිබුණා.
මහමග රැඳී සිටිමින් පොලිස් නිලධාරීන් පිළිබඳව වට්ස් ඇප් සමාජ ජාලය ඔස්සේ අපරාධකරුවන් දැනුවත් කළ බවට මෙම සැකකරුවන් දෙදෙනාට චෝදනා එල්ල වී තිබෙනවා.
ඒ අනුව, ඔවුන් ලබන 16 දින දක්වා රක්ෂිත බන්ධනාගාර ගත කිරීමට කොළඹ ප්‍රධාන මහේස්ත්‍රාත් තිළිණ ගමගේ මහතා ඊයේ (14) නියෝග කර තිබෙනවා.
මෙසේ රක්ෂිත බන්ධනාගාර ගත කෙරුණේ දෙයියන්දර ප්‍රදේශයේ පදිංචි 23 සහ 30 යන වයස්වල පසුවන සැකකරුවන් දෙදෙනෙක්.
