කිරින්ද විහාරය ආසන්නයේදී මුහුදු රළ පහරට හසුවීමෙන් තරුණියක් අතුරුදහන්ව තවත් තරුණියක් මියගොස් තිබෙනවා.
අද (09) උදෑසන කාලයේදී තරුණියන් තිදෙනෙකු සහ තරුණයෙකු මුහුදු රළ පහරට හසුවී ගසාගෙන ගොස් තිබෙව බව සඳහන්.
එම පිරිස අතරින් තරුණයා සහ තවත් තරුණියක් ඔවුන් සමඟ පැමිණි වෙනත් අයෙකු විසින් බේරාගැනීමට සමත්ව තිබෙනවා.
සෙසු තරුණියන් දෙදෙනා අතරින් එක් අයෙකු ප්‍රදේශවාසීන් විසින් බේරාගෙන කිරින්ද රෝහල වෙත ඇතුළත් කිරීමේදී ජීවිතක්ෂයට පත්ව තිබූ අතර පොලීසිය පවසන්නේ අනෙක් තරුණිය දියේ ගිලී අතුරුදන්ව ඇති බවයි.
මියගිය තරුණිය සහ අතුරුදන්ව ඇති තරුණිය 18 හැවිරිදි වියේ පසුවන බිබිල ප්‍රදේශයේ පදිංචිකාරිනියන් බවට හෙළිවී තිබෙනවා.
ඔවුන් එම ප්‍රදේශයේ සිට විනෝද චාරිකාවක් සඳහා කිරින්ද ප්‍රදේශයට පැමිණ තිබෙන අතර අතුරුදන්ව ඇති තරුණිය සොයා විමර්ශන ආරම්භ කර ඇති අතර කිරින්ද පොලීසිය සිද්ධිය සම්බන්ධයෙන් වැඩිදුර විමර්ශන සිදුකරනවා.
