“අමෙරිකන් XL බුලි” නම් සුනඛ වර්ගය තහනම් කිරීමට එක්සත් රාජධානිය තීරණය කර තිබෙනවා.
බ්‍රිතාන්‍ය අගමැති රිෂි සුනක් පවසා ඇත්තේ එම සුනඛයන් ඉතා ප්‍රචණ්ඩ ලෙස හැසිරීම හේතුවෙන් ජනතාව පීඩාවට පත්වී සිටින බවයි.
ප්‍රධාන වශයෙන්ම මෙම සුනඛයින් සපා කෑමෙන් ජීවිත හානි සිදුව තිබෙන බවත් ඒ අතර කුඩා දරුවන්ද සිටින බව විදෙස් මාධ්‍ය වාර්තා කරනවා.
එබැවින් මෙම වසර අවසානයේ සිට එක්සත් රාජධානියේ මෙම සුනඛ වර්ගය ඇතිකිරීම තහනම් කිරීමට නව නීති ගෙන එන බව අගමැති රිෂි සුනක් පවසා ඇති බව වාර්තා වෙනවා.
විදෙස් මාධ්‍ය වැඩිදුරටත් පවසන්නේ එක්සත් රාජධානියේ අන්තරායකර සුනඛ පනත යටතේ මෙම සුනඛ වර්ගය තහනම් කිරීමට කටයුතු කරන බවයි.
මේ අතර ඇතැම් පිරිස් එම තීරණයට විරෝධය දක්වා ඇති බවද සඳහන් වෙනවා.
කෙසේවෙතත් එරට ප්‍රධාන පශු වෛද්‍ය නිලධාරිනිය පවසා ඇත්තේ, මේ වන විටත් අදාළ සුනඛයින් ඇති කරන පිරිසට එම සුනඛයින් මියයන තුරු දැඩි නීති රෙගුලාසි හමුවේ ඔවුන් රැක බලාගත හැකි බවයි.
එමෙන්ම එම වර්ගයේ සියලුම සුනඛයින් වඳභාවයට පත්කළ යුතු බවත් ඔවුන් නිවසින් පිටතට රැගෙන යන සෑම විටකදීම මුඛවාඩම් පැළඳවීම අනිවාර්යය බවත් ඇය වැඩිදුරටත් පවසා තිබෙනවා.
