විශාකා විදුහල්පතිනිය සාහිත්‍ය උගන්වන්න ආ ගුරුවරයාට තර්ජනය කරලා

කොළඔ විශාඛා විද්‍යාලයේ උසස් පෙළ සිංහල භාෂාව හා සාහිත්‍යය විෂයය ඉගැන්වීම ගිය ගුරුවරයෙකු එම පාසලේ වැඩභාර නොදෙන බව පවසා ඔහු විසින් ගෙනෙන ලද සේවයෙන් නිදහස් කිරීමේ ලිපිය ඇගට විසිකර දමා, පාසලේ ආරක්ෂකයින් 4 දෙනෙකු තම කාර්යාලයට ගෙන්වාගෙන තර්ජනය කොට විදුහල්පති කාමරයෙන් එළියට ඇද දැමීමට උත්සාහ කිරිම දැඩි පිළිකුළෙන් හෙළා දකින බව ලංකා ගුරු සංගමයේ ලේකම් ජෝසෆ් ස්ටාලීන් මහතා නිව්ස්19 වෙත පැවසීය.

එම ගුරුවරයා ජනවාරි 04 දින විද්‍යාලයේ වැඩ භාර ගැනීමට ගිය අවස්ථාවේ දී මෙම සිදුවීම වාර්තා වී ඇත.

එම අවස්ථාවේදී විශාකා විදුහලේ විදුහල්පතිනය වන සඳමාලි අවිරුප්පල මහත්මිය විසින් ශාන්ත පාවුළු විද්‍යාලයේ විදුහල්පතිනියගේ නම සඳහන් කරමින් ඇගේ ගෝලයන්ට මෙම පාසලේ වැඩභාර නොදෙන බව පවසා ඇති බවත් ජෝසෆ් ස්ටාලීන් මහතා පවසයි.

සිද්ධියට මුහුණ දුන් එච්.ජී. වසන්ත මහතා අධ්‍යාපන ලේකම්වරයාට 2021.10.05 දිනැතිව ලිඛිත පැමිණිල්ලක් කර ඇති අතර, 2021.01.05 දිනම රාජකාරියට වාර්තා කිරීමට ඉඩ නොදීම මත  බම්බලපිටිය පොලීසියට  CIB I 180/22 අංකයෙන් පැමිණිල්ලක් ද ඉදිරිපත් කොට ඇත.

විශාකා විදුහලේ විදුහල්පතිනයගේ අත්තනෝමතික කි‍්‍රයාකාරීත්වයන් සම්බන්ධයෙන් විවිධ පැමිණිලි ඉදිරිපත්ව තිබියදී අධ්‍යාපන අමාත්‍යාංශය ඇය සම්බන්ධයෙන් සහනශීලී පියවරක් අනුගමනය කිරීම  බරපතල පක්ෂපාතී තත්වයක් බවත් ස්ටාලීන් මහතා පැවසීය.

තවද විශාකා විද්‍යාලයේ 2019 වසරේ පළමු ශ්‍රේණියට ළමුන් ඇතුළත් කිරීම සම්බන්ධයෙන් සිදු වූ අක‍්‍රමිකතා පිළිබඳ චෝදනා 15 ක් අඩංගු චෝදනා පත‍්‍රයක් රාජ්‍ය සේවා කොමිසම විසින් 2019.09.25 දිනැතිව ඇයට ලබා දී ඇති අතර, ඒ සම්බන්ධයෙන් වන විනය පරීක්ෂණය මේ දක්වා අවසන් කොට නැත.

එසේ තිබියදී ළමුන් ඇතුළත් කිරීම සම්බන්ධයෙන් ඇයට චෝදනා ඉදිරිපත් වී තිබියදී 2021 ට අදාළ ළමුන් ඇතුළත් කිරීමේ කි‍්‍රයාවලියට ඇය ඇතුළත් නොකළ යුතු බවට ලංකා ගුරු සංගමය අධ්‍යාපන ලේකම්වරයාට සහ රාජ්‍ය සේවා කොමිසමේ ලේකම්වරයාට පැමිණිලි කර ඇති බවත් ඒ සම්බන්ධයෙන් රාජ්‍ය සේවා කොමිසම 2020.07.07 දිනැතිව ESC/GEN/01/09/2019 අංකයෙන් යුතු ලිපියක් අධ්‍යාපන ලේකම් වෙත යොමු කරමින් ඒ සම්බන්ධයෙන් වන නිරීක්ෂණ අධ්‍යාපන ලේකරම්වරයාගෙන් ඉල්ලා තිබුණු නමුත් මේ දක්වා අදාල පැමිණිල්ලට කිසිදු විමර්ශණයක් සිදු කර නොමැති බවත් ස්ටාලීන් මහතා පවසයි.

අධ්‍යාපන අමාත්‍යාංශය යටතේ සේවය කරන මෙම විදුහල්පතිනියට චෝදනා පත‍්‍රයක් තිබියදී හා මෙලෙස අත්තනෝමතිකව කටයුතු කරද්දී,  ඇය ජනාධිපතිවරයා විසින් 2169/2 දරණ අති විශේෂ ගැසට් පත‍්‍රයෙන් පත් කරන ලද ශී‍්‍ර ලංකාවේ අධ්‍යාපන කටයුතු පිළිබඳ ජනාධිපති කාර්ය සාධක බලකායේ සාමාජිකාවක් ලෙස ද පත් කර තිබීම ගැටලූකාරී තත්වයක් බවත් ස්ටාලීන් මහතා පැවසීය.