කොවිඩ් වසංගතයට මුහුණදීම අතින් හා වසංගතය මර්දනය කිරීම අතින් දකුණු ආසියානු කලාපය තුළ ශ්‍රී ලංකාව ඉදිරියෙන්ම සිටින බව ක්‍රීඩා අමාත්‍ය නාමල් රාජපක්ෂ මහතා පවසනවා.
ඇමතිවරයා මේ බව සඳහන් කළේ සංචාරක ක්ෂේත්‍රයේ නියුතු ලක්ෂ 05 කට කොවිඩ් ප්‍රතිශක්තීකරණ එන්නත් ලබාදීමේ වැඩසටහන ආරම්භ කිරීමේ අවස්ථාවට සහභාගි වෙමින්.
නාමල් රාජපක්ෂ මහතාගේ සහ සංචාරක අමාත්‍ය ප්‍රසන්න රණතුංග මහතාගේ ප්‍රධානත්වයෙන් හම්බන්තොටදී මෙම වැඩසටහන ඇරඹුණු අතර සංචාරක හෝටල්වල සේවය කරන පුද්ගලයන් 500 කට සහ සංචාරක මාර්ගෝපදේශකයන්, සංචාරක රියදුරන්, සෆාරි රියදුරන් ඇතුලු ක්ෂේත්‍රයේ නිරත සේවකයන් 150 කට පමණ මධ්‍යස්ථාන හතරකදී එන්නත් ලබාදීම එහිදී සිදු විය.
මෙරට ඉතිහාසයේ දැවැන්තම එන්නත්කරණ වැඩසටහන මේ වනවිට රටතුළ ක්‍රියාත්මක වන බවත් කොවිඩ් වසංගතය හේතුවෙන් කඩාවැටුණු ජන ජීවිතය ක්‍රමයෙන් යථා තත්වයට පත්වෙමින් තිබෙන බවත්, ආර්ථික හා සමාජයීය ස්ථාවරත්වය සඳහා අවශ්‍ය ක්‍රියාමාර්ග ගනිමින් සිටින බවත් ඇමතිවරයා පවසනවා.
ජෛව ආරක්ෂණ බුබුළු ක්‍රමය හරහා සංචාරයක් ගෙන්වීම සිදුකළ දකුණු ආසියාවේ පළමු රට බවට පත්වීමට හැකි වූ බවද , එපමණක් නොව LPL තරගාවලිය පවා ඉතා සාර්ථකව පැවැත්වූ බවත්, මේ වනවිට දකුණු ආසියානු රටවල් රැසක් ශ්‍රී ලංකාව ආදර්ශයට ගනිමින් සංචාරක ව්‍යාපාරය සහ ක්‍රීඩා තරග ක්‍රියාත්මක කරන බවත් ඔහු වැඩිදුරටත් පවසනවා.
