ව්‍යවස්ථාවට අනුව, මැතිවරණ කොමසාරිස්වරයා විසින් මැතිවරණයක් ප්‍රකාශයට පත් කිරීමෙන් අනතුරුව ඒ මැතිවරණය සාර්ථක කර ගැනීමට සියළු රාජ්‍ය ආයතන සහය දිය යුතු බවත් නොඑසේ නම් අදාල ප්‍රධානීන්ට වසර 03ක සිර දඬුවමක් ලබාදීමට කටයුතු කළ හැකි බවත් ලක්ෂ්මන් කිරිඇල්ල පවසනවා.
අද (21) දින පාර්ලිමේන්තුව අමතමින් ඔහු පෙන්වා දුන්නේ මැතිවරණය නොපැවැත්වුවහොත් GSP+ සහනය අහිමි වීමද සිදුවන බවයි.
ඉන් අනතුරුව අදහස් දැක්වූ රංජිත් බණ්ඩාර පෙන්වා දුන්නේ රජයේ මූල්‍ය බලතල පාර්ලිමේන්තුවට හිමි බවයි
2023 අයවැයෙන් රුපියල් බිලියන 10ක මුදලක් මැතිවරණ සඳහා වෙන් කර ඇති බවත් එබැවින් මැතිවරණයට අවශ්‍ය මුදල් නිකුත් කරන ලෙසට කථානායකවරයා විසින් නියෝග කළ යුතු බවත් ඔහු පවසනවා.
ඉන් අනතුරුව, අදහස් දැක්වූ චමින්ද විජේසිරි පෙන්වා දුන්නේ සම්මත වූ වැය ශීර්ෂයක් වෙනස් කරන්නේ නම් එය පාර්ලිමේන්තු යෝජනාවක් හරහා පමණක් කළ හැකි බවයි.
පසුව අදහස් දැක්වූ විමල් වීරවංශ පවසා සිටියේ මුදල් නොමැති බව පවසමින් මැතිවරණ කල් දැමීම ඇරඹුවහොත් ඉන් පසුව ජනාධිපතිවරණයක් වුවද එම තර්කය මත කල් දමනු ඇති බවයි. තවද මුදල් නොමැති බව පවසමින් පාර්ලිමේන්තුව ද වසා දමනු ඇති බවත් ඔහු අවධාරණය කර සිටියා.
ඉන් අනතුරුව පාර්ලිමේන්තුව යම් උණුසුම් තත්වයක් ගත් අතර විපක්ෂයේ මන්ත්‍රීවරුන් විසින් විරෝධතා පුවරු ද රැගෙන ඉදිරියට පැමිණ විරෝධතාවයේ නිරත වුණා.
