වගකීම් සහගත අසල්වැසි රටක් වශයෙන් ශ්රී ලංකාව, ඉන්දියාවේ ජාතික ආරක්ෂාවට හානි කිරීමට ඉඩ නොතබන බව විදේශ අමාත්ය අලී සබ්රි මහතා පවසා තිබෙනවා.
ඉන්දීය ප්රවෘත්ති නාලිකාවක් සමඟ පැවති සම්මුඛ සාකච්ඡාවකදී ඔහු මේ බව පවසා තිබුණා.
චීන පර්යේෂණ යාත්රා ශ්රී ලංකාවට පැමිණීම සම්බන්ධයෙන් ඉන්දියාව දක්වන අවධානය සැලකිල්ලට ගනිමින් අමාත්යවරයා පවසා ඇත්තේ වෙනත් රටවලට හානි සිදු නොවන ආකාරයට මිත්ර රටවල් සමඟ විනිවිද භාවයකින් යුතුව සබඳතාව පවත්වා ගැනීමට ශ්රී ලංකාව සූදානම් බවයි.
“අපි සෑම රටක් සමඟම සහයෝගයෙන් වැඩ කරන්න කැමතියි. කෙසේවෙතත් ඉන්දියාවේ ආරක්ෂාව සම්බන්ධයෙන් තර්ජනයක් මතුවේ නම් ඒ සම්බන්ධයෙන් අපි දැඩි අවධානයකින් යුතුව කටයුතු කරනවා.
මෑතකදී මට දැනගන්නට ලැබුණා, ඉන්දියාවේ විශාලතම වාණිජ සහකරු බවට චීනය පත් වී ඇති බව. ඒ හා සමානවම ශ්රී ලංකාවත් තෙවන පාර්ශවයකට තර්ජනයක් එල්ල නොවන ආකාරයට වෙනත් රටවල් සමඟ සබඳතා පවත්වා ගැනීමේ ප්රතිපත්තියක් අනුගමනය කිරීමට කැමැතියි.”