සංචරණ සීමා පනවා හුදෙකලා කර ඇති ප්‍රදේශවල ජනතාවට රුපියල් 5000 ක සහන මල්ලක් ලබාදීමේ වැඩසටහනක් මේ වන විට රජයෙන් ක්‍රියාත්මක කෙරෙනවා.
කෙසේ වෙතත් අදාළ ක්‍රියාවලිය දේශපාලනීකරණය වී ඇති නිසා මේ වන විට දැඩි ලෙස සෞඛ්‍ය මාර්ගෝපදේශ කඩකරමින් සිටින ආකාරය දිවයිනේ ප්‍රදේශ කිහිපයකින්ම වාර්තා වනවා.
දඹුල්ල, ගලේවෙල, නාවුල යන ප්‍රදේශවල ජනතාව එක්රැස්කරමින් රුපියල් 5000 භාණ්ඩ මල්ල ලබාදීමේ වැඩපිළිවෙලට දේශපාලඥයින් මැදිහත්වීම නිසා මේ වන විට ජනතාව ඉවක්බවක් නොමැතිව භාණ්ඩ බෙදන ස්ථානයට රැස්වෙමින් තිබෙනවා.
එම ස්ථානයේ කිසිදු සමාජ දුරස්ථභාවයක් නොමැතිව ප්‍රදේශවාසීන් කටයුතු කරන අතර එය ඉදිරියේදී දැඩි සෞඛ්‍ය අර්බුදයකට අතවැනීමක් බවට පැහැදිලිව දක්නට ලැබෙනවා.
අදාළ සහන මල්ල නිවසටම ලබාදෙන බව පවසා සිටියත් ප්‍රදේශයේ දේශපාලකයන් හට ලකුණු දමාගැනීම සඳහා මෙම ක්‍රියාවලිය සිදුවන බවයි ජනතාව පවසන්නේ.
