කටුනායක ගුවන්තොටුපළට පසුගිය අඟහරුවාදා (14) අලුයම් කාලයේ පැමිණි ආණ්ඩුවේ තනකුරක් දරන දේශපාලකයෙක් විසින් ගුවන් මගීන්ගේ ගමන් මලු එහා මෙහා ගෙන යන සේවකයකුගේ (පෝටර්) කනට ගසා ආරක්ෂක නිලධාරින් කිහිප දෙනකුට බැන තර්ජනය කර පිටව ගොස් තිබෙන බව ගුවන්තොටුපොළ ආරංචි මාර්ග පවසනවා.
මෙම දේශපාලකයාගේ බිරිඳ ඇතුළු කිහිප දෙනකු විදෙස් සංචාරයකට යෑම සඳහා කටුනායක ගුවන්තොටුපොළට පෙරේදා අලුයම් කාලයේ පැමිණ තිබෙනවා.
සිය ආරක්ෂකයන් ද පිරිවරාගෙන පැමිණි රාජ්ය අමාත්යවරයා ඔවුන් කටුනායක ගුවන් තොටුපොළට ඇරලවීම සඳහා ප්රවේශපත්ර මිලදී නොගෙන ප්රධාන දොරටුවෙන් ගුවන්තොටුපොළට ඇතුළු වීමට ගොස් තිබෙන බව ගුවන් තොටුපළේ උසස් නිලධාරීන් පැවසුවා.
එහිදී ගුවන් තොටුපොළ ආරක්ෂක නිලධාරීන් විසින් ඒම දේශපාලකයාට පවසා තිබෙන්නේ ආරක්ෂකයින් ගිනි අවිවලින් සන්නද්ධව සිටි නිසා ඒවා රැගෙන යාමට ඉඩ දිය නොහැකි බවයි.
එම අවස්ථාවේ ඔහු ගුවන් තොටුපොළ ආරක්ෂක නිලධාරීන්ටද බැණ වැදී ඔහුගේ ගමන වැළැක්වූ බව පැවසෙන ගුවන් තොටුපොළ ආරක්ෂක අංශ නිලධාරීන් දෙදෙනාගේ ඡායාරූප ද සිය ජංගම දුරකථනයෙන් ලබාගෙන තිබෙන බව එම උසස් නිලධාරීන් පවසනවා.
ඔහු සමග පැමිණි අයගේ ගමන් මලු ගුවන් තොටුපොළට රැගෙන යෑම වෙනුවෙන් පෝටර්වරයාවරයාට අඩුවෙන් මුදල් ලබාදීම නිසා ඔහු නියමිත ගාස්තුව දේශපාලකයාගෙන් ඉල්ලා තිබෙන අතර එයින් කුපිත වූ දේශපාලකයා එම පෝටර්වරයාගේ කකුල සපත්තුවෙන් පාගා ඔහුගේ කණට වැරෙන් පහරක් ගසා ආරක්ෂකයන් සමග පිටව ගොස් තිබෙන බව ගුවන් තොටුපොළ ආරංචි මාර්ග සඳහන් කරනවා.
පහර කෑමට ලක්වූ බව පැවසෙන පෝටර්වරයා දේශපාලනඥයාට ඇති බිය නිසා සහ අනවශ්ය කරදර ඇති වේ යැයි සිතා මේ සම්බන්ධයෙන් පොලිසියට පැමිණිලි කිරීමට ගොස් නොමැති බව පැවසෙනවා.