2023 ලෝක කුසලාන ක්‍රිකට් තරගාවලිය ඉන්දියාවේ අහමදාබාද්හි නරේන්ද්‍ර මෝදි ක්‍රීඩාංගණයේදී අද (05) ආරම්භ වනවා.
එහි පළමු තරගයට එක්වන්නේ ගියවර ලෝක ශූර එංගලන්තය සහ අනුශූරයන් වන නවසීලන්තයයි
1975 වසරේදී එංගලන්තයේදී ඇරඹි ලෝක කුසලාන ක්‍රිකට් තරගාවලියේ 13 වැනි අදියර අද ආරම්භ වනවා.
ඉන්දියාව සත්කාරකත්වය දරන මෙවර ලෝක කුසලාන ක්‍රිකට් තරගාවලිය ක්‍රීඩාංගණ 10කදී පැවැත් වීමට නියමිතයි.
තරගාවලිය ආරම්භ කරමින් අද තරග බිමට පිවිසෙන එංගලන්තයේ සහ නවසීලන්තයේ ක්‍රීඩකයින් කිහිපදෙනෙක් ආබාධවලට ලක්ව ඇති බව විදෙස් වාර්තා පවසනවා.
ඒ අනුව එංගලන්තයේ බෙන් ස්ටෝක්ස් ආබාධයක් හේතුවෙන් අද තරගයට සහභාගී වීම අවිනිශ්චිත බවට සඳහන් වනවා.
මේ අතර නවසීලන්ත නිත්‍ය නායක කේන් විලියම්සන් සහ වේග පන්දු යවන ක්‍රීඩක ටිම් සවුතිගේ සහභාගීත්වය ද අවිනිශ්චිත බව අන්තර්ජාතික ක්‍රිකට් කවුන්සිල නිල වෙබ් අඩවියේ සඳහන්.
දෙරට අතර මේ වන විට එක්දින ජාත්‍යන්තර තරග 95ක් පවත්වා තිබෙන අතර දෙපිලම තරග 44 බැගින් ජය ඇති අතර තවත් තරග 3ක් අවසන් වූයේ ලකුණු සම වීමෙන් අනතුරුවයි.
අනෙක් තරග 4 තීරණයකින් තොරව අවසන් වුණා.
අද තරගය මෙරට වේලාවෙන් පස්වරු 2.00 ට ඉන්දියාවේ අහ්මදාබාද්හි නරේන්ද්‍ර මෝදි ක්‍රීඩාංගණයේදී ආරම්භ වීමට නියමිතයි.
ලොව විශාලම ප්‍රේක්ෂක ධාරිතාවක් ඇති දැවැන්තම ක්‍රිකට් ක්‍රීඩාංගණය වන මෙහි ප්‍රේක්ෂකයින් 130,000කට එකවර අසුන්ගත හැකි බැවින් ලෝක කුසලාන ක්‍රිකට් තරගාවලියේ මුල්ම තරගය හා අවසන් මහා තරගය මෙහි පැවැත්වීමට සැලසුම් කොට තිබෙනවා.
