ලොව අංක එකේ ටෙනිස් ක්‍රීඩිකා ඔස්ට්‍රේලියාවේ ඈෂ්ලි බාටි ජාත්‍යන්තර ටෙනිස් පිටියෙන් සමුගන්නා බව නිවේදනය කළා.
තවමත් 25 හැවිරිදි වියේ පසුවන ඇය මෙලෙස සිය සමුගැනීම නිවේදනය කිරීම පිළිබඳ ක්‍රීඩාලෝලීන් විමතියට පත්ව සිටිනවා.
ග්‍රෑන්ඩ් ස්ලෑම් ටෙනිස් ශූරතා තුනක් ජයගෙන ඇති ඔස්ට්‍රේලියාවේ ඈෂ්ලි බාටි ඊයේ පැවති සම්මුඛ සාකච්ඡාවක් අතරතුර ටෙනිස් පිටියෙන් සමුගන්නා බව නිවේදනය කළා.
25 හැවිරිදි වියේ පසුවන ඔස්ට්‍රේලියාවේ ඈෂ්ලි බාටි ටෙනිස් ක්‍රීඩාව ආරම්භ කිරීමට පෙර ගොල්ෆ්, ක්‍රිකට් වැනි ක්‍රීඩාවල නිරත වුණා.
ඇය වෘත්තිය වශයෙන් ටෙනිස් ක්‍රීඩාවට පිවිසෙන්නේ 2010 වසරේදියි.
බාටි 2019 වසරේදී ප්‍රංශ විවෘත ටෙනිස් ශූරතාව ජයග්‍රහණය කිරීමත් සමඟ ඇය පිළිබඳ සියලු දෙනාගේ අවධානය හිමිවුණා.
ඒවනවිට බාටි ලෝක ටෙනිස් කාන්තා ශ්‍රේණිගත කිරීම්වල පළමු ස්ථානයද තමන් සතු කරගත්තා.
2021 වසරේදී විම්බල්ඩන් ටෙනිස් ශූරතාව ජයගත් බාටි 2022 වසරේදී ඔස්ට්‍රේලියා ටෙනිස් ශූරතාව ජයගැනීමට සමත්වුණා.
ඒ අනුව 2019 වසරේ ජුනි 24 වැනිදා සිට මේදක්වා කාන්තා ලෝක ටෙනිස් ශ්‍රේණිගත කිරීම්වල පළමු ස්ථානයේ පසුවන්නේ ඔස්ට්‍රේලියාවේ ඈෂ්ලි බාටියි.
මෙම වසරේ ඔස්ට්‍රේලියා විවෘත ටෙනිස් ශූරතාව ජයග්‍රහණය කර මාස දෙකක් වැනි කෙටි කාලයකදී බාටි සමුගැනීම නිවේදනය කිරීම පිළිබඳ සියලු දෙනාම විමතියට පත්ව සිටිනවා.
