ශ්‍රී ලංකාව, ඔස්ට්‍රේලියාව සහ එංගලන්තය අතර වයස අවුරුදු 19න් පහළ කාන්තා ක්‍රිකට් කණ්ඩායම් සහභාගී වෙන තුන් කොන් විස්සයි විස්ස ක්‍රිකට් තරගාවලිය මේ දිනවල පැවැත්වෙනවා.
එහි ඕස්ට්‍රේලියාවට එරෙහිව පැවති 20-20 පළමු හා දෙවන තරඟ දෙකම ජය ගැනීමට ශ්‍රී ලාංකික ක්‍රීඩිකාවන් සමත් වුණා
මෙම තරඟාවලියේදී ශ්‍රී ලංකා කණ්ඩායම වෙනුවෙන් තරඟ වදින 14 හැවිරිදි චමුදි ප්‍රබෝදා වෙත මේ දිනවල විශේෂ අවධානයක් හිමි වී තිබෙනවා.
ඒ ඇය, වයස අවුරුදු 19න් පහළ ජාතික කාන්තා ක්‍රිකට් කණ්ඩායම නියෝජනය කරන ලාබාලතම ක්‍රීඩිකාව වීම හේතුවෙන්.
මොනරාගල දිස්ත්‍රික්කයේ කුඹුක්කන ගම්මානයෙන් ක්‍රීඩා දිවියට වෙත පිවිස ඇති චමුදි 2009 වසරේ අප්‍රේල් 25 වන දින උපත ලබා තිබෙනවා.
කුඹුක්කන පඤ්ඤානන්ද විද්‍යාලයේ අධ්‍යාපනය ලබා ඇති ඇය ජාතික කණ්ඩායම සඳහා සුදුසුකම් ලැබීමට පෙර මොණරාගල දිස්ත්‍රික් ක්‍රිකට් කණ්ඩායම හා ඌව පළාත් කණ්ඩායම නියෝජනය කර තිබුණා.
වමත් දඟ පන්දු යවන ක්‍රීඩිකාවක් වන චමුදි ප්‍රබෝදාව ඇයගේ කණ්ඩායම් සඟයන් හඳුන්වන්නේ ‘බට්ටි’ නමින්.
වයස අවුරුදු 14 ක් වැනි කුඩා වයසකදී ජාතික යොවුන් කාන්තා කණ්ඩායම නියෝජනය කිරීම පමණක් නොව මොනරාගල වැනි දුෂ්කර ප්‍රදේශයකින් ක්‍රීඩාවට පිවිසෙමින් ඉහළ දක්ෂතා අතරට ළඟා වීමට ඇය සමත්ව තිබීමද අගය කළ යුතු කරුණක්.
