ලක්ෂ 16ක් පමණ වු රටේ රාජ්ය සේවයේ නිරතවුවන්ගෙන් දස ලක්ෂයක් පමණ කිසිදු ඵලදායී සේවාවක් සිදුනොකරන බව අමාත්ය රොෂාන් රණසිංහ පවසනවා.
ඒ, කුරුණෑගල ප්රදේශයේ දී මාධ්ය වෙත අදහස් දක්වමින්.
රාජ්ය සේවය රාජ්ය සේවකයින් විසින්ම විවේචනය කරන තත්ත්වයට පත්ව ඇති බවත් අමාත්යවරයා සඳහන් කරනවා.
“දේශපාලඥයින්ට තියෙනවා ලොකු කැපකිරීමක් කරන්න. ඒ අයට මහන්සි වෙන්න වෙනවා. ජනතාවගේ ප්රශ්නවලට ක්ෂණික තීන්දු දෙන්න ඕනේ. ඒ වගේම තමා රාජ්ය සේවය. රාජ්ය සේවයේ ලක්ෂ 16ක් ඉන්නවා. මම බොහෝම පැහැදිලිවම කියනවා අවංකව තමන්ගේ සේවය කරන්නේ මේ ලක්ෂ 16 යෙන් ලක්ෂ 6යි. ඒක තමා ඇත්ත. රාජ්ය සේවකයෝමයි විවේචනය කරන්නේ රාජ්ය සේවය. තුන්දා නීතිය වගේ වැඩපිළිවෙලක් ගේන එක අනිවාර්යයෙන්ම කාලෝචිතයි කියන එක අපි දන්නවා. ඒ නිසා මෙවැනි ක්රියාමාර්ග ගත යුතුමයි. මෙතැනින් එහාට වැටෙන්න තැනක් නෑ. උපරිම වැටිලා ඉන්නේ. හැබැයි ගොඩඑන එක වේගයෙන් ගොඩ එන්න පුළුවන් දේශපාලඥයා සහ රාජ්ය සේවකයා කැපවීම් කළොත්.”
මේ අතර, පොදුරාජ්ය මණ්ඩලයීය ක්රීඩා උළෙලේ දී බර ඉසිලීමේ ඉසව්වකින් ලෝකඩ පදක්කම දිනාගත් බර ඉසිලීමේ ක්රීඩක දිලංක ඉසුරු හමුවීමට යෞවන හා ක්රීඩා අමාත්යවරයා ඊයේ කුරුණෑගල – වැල්ලව ඔහුගේ නිවසට පැමිණියා.
එහි දී යෞවන හා ක්රීඩා අමාත්ය රොශාන් රණසිංහ ද ක්රීඩාවේ ප්රගමනය උදෙසා වන ඉදිරි වැඩසටහන් පිළිබඳව අදහස් දැක්වූ අතර ඔහු කියා සිටියේ ඉදිරියේදී ජාතික ක්රීඩා කවුන්සලය හරහා සෑම ක්රීඩා සංගමයක් කැදවා සාකච්ඡා සිදු කෙරෙන බවයි.
තානාපති කාර්යාල හරහා විවිධ රටවලින් එක් එක් ක්රීඩාවන් ප්රවර්ධනයට අවශ්ය සහයෝගය ලබා ගැනීම සම්බන්ධයෙන්ද අවධානය යොමුව ඇති අතර මෙරට ව්යාපාරික ආයතන හා සමාගම් හරහා එක් එක් ක්රීඩාවන්ට අනුග්රාහකත්වය ලබා ගැනීම සදහාද කටයුතු කරමින් සිටින බවයි අමාත්ය රොශාන් රණසිංහ කියා සිටියේ.