කොවිඩ් 19 අර්බුදය හමුවේ විශාල කාර්ය භාර්යයක් ඉටුකරන සුවසැරිය ගිලන් රථ සේවයට තවත් ගිලන් රථ 112 ක් එකතු කිරීම සඳහා රජය කටයුතු කිරීමට නියමිතයි.
ඒ අනුව ප්‍රාථමික සෞඛ්‍ය සේවා, වසංගත රෝග හා කොවිඩ් රෝග පාලන කටයුතු රාජ්‍ය අමාත්‍ය සුදර්ශනී ප්‍රනාන්දුපුල්ලේ මහත්මිය සිදුකරන ලද අදාළ යෝජනාවට ජනාධිපති ගෝඨාභය රාජපක්ෂ මහතාගේ පූර්ණ එකඟත්වය ලැබී තිබෙනවා.
අදාළ යෝජනාව නුදුරු දිනෙක ඇමති මණ්ඩලයට ඉදිරිපත් කිරීමට නියමිත බවයි වාර්තා වන්නේ.
1990 සුව සැරිය ගිලන් රථ සේවයට මේ වනවිට දිනකට ලැබෙන දුරකතන ඇමතුම් සංඛ්‍යාව පන් දහස ඉක්මවනවා.
දිනකට රෝගීන් දහසකට අධික පිරිසක් එම සේවය මගින් රෝහල් ගත කෙරෙනවා.
සුවසැරිය ගිලන් රථ සේවයේ මේ වන විට 1394 ක කාර්ය මණ්ඩලයක් හා ගිලන් රථ 297 ක් සේවයේ යොදවා තිබෙනවා.
සුව සැරිය ගිලන් රථ සේවය යනු පසුගිය රජය සමයේ ඩොලර් දෙකෝටි 20 ලක්ෂයක ඉන්දියානු ආධාර යටතේ ආරම්භ කළ නොමිලේ සේවය සැපයෙන ව්‍යාපෘතියකි.
කෙසේ වෙතත් මෙම ගිලන් රථ සේවය මෙරටට රැගෙන ඒම පිළිබදව විමල් වීරවංශ මහතා ඇතුළු එකල විපක්ෂය හා රජයේ වෛද්‍ය නිලධාරීන්ගේ සංගමය දැඩිව විරෝධය පලකළා.
