කීරි සම්බා සහල් වැඩි මිලට අලෙවි කළ ගිනිගත්හේන විවිධ සේවා සමුපකාර සමිතියට රුපියල් ලක්ෂ පහක දඩයක් නියම කර තිබෙනවා.
කීරි සම්බා සහල් වැඩි මිලට අලෙවි කිරිමේ චෝදනාව යටතේ නුවරඑළිය දිස්ත්රික් පාරිභෝගික සේවා අධිකාරිය විසින් ගිනිගත්හේන විවිධ සේවා සමුපකාර සමිතියට එරෙහිව හැටන් මහෙස්ත්රාත් අධිකරණය හමුවේ නඩුවක් ගොනු කර තිබුණා.
එහිදී, මෙම චෝදනා සඳහා වරද පිළිගත් එම සමිතියේ කොප් සිටි සුපිරි වෙළඳ සැලේ කලමණාකාරවරයාට රුපියල් ලක්ෂ පහක දඩ මුදලක් ගෙවන ලෙසට හැටන් දිසා විනිසුරු සහ මහෙස්ත්රාත් එම්.ෆරුක්ඩින් මහතා ඊයේ (03) දින නියෝග කළා.
කීරි සම්බා සහල් රජයේ අනුමත මිලට වඩා රු 100 ක් වැඩි කර එම සමිතියේ කොප් සිටි සුපිරි වෙලදසැලින් අලෙවි කරන බවට පාරිභෝගිකයන්ගෙන් පැමිණිලි කිහිපයක් ලැබී තිබුණා.
නුවරඑළිය දිස්ත්රික් පාරිභෝගික සේවා අධිකාරි කාර්යාලයේ ස්ථානාභාර නිලධාරී අමිල රත්නායක මහතා සඳහන් කළේ එම පැමිණිලි මත වැටලිමක් සිදු කර එම සමිතියේ කලමණාකාරවරයාට එරෙහිව හැටන් මහෙස්ත්රාත් අධිකරණය හමුවේ නෛතික පියවර ගත් බවයි.
(හැටන්- රංජිත් රාජපක්ෂ)