සිංහල හින්දු අලුත් අවුරුද්දට නෑගම් යමින් සිටි එකම පවුලේ පිරිසක් රැගත් මෝටර් රථයක් හාලිඇල ගණදෙවි දේවාලය අසලදී මාර්ගයෙන් ඉවතට පැන මාරගසක ගැටීමෙන් අනතුරට ලක්වී තිබෙනවා.
එම මෝටර් රථයේ ගමන්ගත් කාන්තාවන් දෙදෙනකු මියගොස් පියකු සහ දියණියක බරපතළ තුවාල ලබා බදුල්ල ශික්ෂණ රෝහලට ඇතුළත් කළ බව හාලිඇල පොලිසිය පවසනවා.
මෙම අනතුර සිදු වී ඇත්තේ අද (14) බදුල්ල බණ්ඩාරවෙල ප්‍රධාන මාර්ගයේදීයි.
ගම්පහ දොම්පේ පුවක්වත්ත ප්‍රදේශයේ පදිංචිව සිටි 70 හැවිරිදි H.M කමලාවතී සහ 51 හැවිරිදි මුදුගමහේවගේ සිරියාවති යන කාන්තාවන් දෙදෙනා මෙම අනතුරින් මියගිය බව පොලිසිය සඳහන් කළා.
පොලීසිය පවසන්නේ, මෙම අනතුරින් 53, හැවිරිදි පියා සහ 22 හැවිරිදි දියණියක තුවාල ලබා බදුල්ල ශික්ෂණ රෝහලේ දැඩි සත්කාර ඒකකයේ ප්‍රතිකාර ලබමින් පසුවෙන බවයි.
මොවුන් හාලිඇල බෝගහමඩිත්ත ප්‍රදේශයේ පදිංචිව සිටින සිය දියණියගේ නිවසට සිංහල හින්දු අලුත් අවුරුද්දට නෑගම් යමින් සිටියදී මෙසේ අනතුරට ලක්ව ඇති බවයි පොලීසිය වැඩිදුරටත් සඳහන් කරන්නේ.
සිද්ධිය සම්බන්ධයෙන් හාලිඇල පොලිස් ස්ථානාධිපති පොලිස් පරික්ෂක රුවන් ගුණතිලක මහතා ඇතුලු නිලධාරීන් වැඩිදුර පරික්ෂණ පවත්වනු ලබනවා.
