කොරෝනා වසංගතය නිසා මෙරට මියයන පුද්ගලයින් ප්‍රමාණයට වඩා දස ගුණයක් වකුගඩු රෝගයෙන් මියයන බවත් ඊට හේතුවී ඇත්තේ රසායනික පොහොර භාවිතය බවත් රජයේ වෛද්‍ය නිලධාරීන්ගේ සංගමයේ සභාපති වෛද්‍ය අනුරුද්ධ පාදෙනිය මහතා පවසයි.
වෛද්‍ය අනුරුද්ධ පාදෙනිය මහතා මේ බව පැවසුවේ ඊයේ (21) රජයේ වෛද්‍ය නිලධාරීන්ගේ සංගමය විසින් පැවැත්වූ මාධ්‍ය හමුව අමතමිනි.
කොරෝනා වසංගතයෙන් පුද්ගලයින් මියයාමට හේතුව ඔවුන්ගේ ප්‍රතිශක්තිකරණය අඩුවීම බවත් එසේ ප්‍රතිශක්තිකරණය අඩුවීම ගැන සලකා බැලීමේදී 1960 දශකයේ සිට මෙරට සාම්ප්‍රදායික වස විස නොමැති ගොවිතැන අත්හැරීම සම්බන්ධයෙන් සලකා බැලිය යුතු බවත් පැවසූ ඒ මහතා රසායනික පොහොර භාවිතයට මෙරට ජනතාව හුරුකිරීම යනු විදේශිකයින්ගේ සමූහ ඝාතන උපක්‍රමයක් වශයෙන් ද හඳුන්වා දෙන ලදි.
ඒ අනුව රසායනික පොහොර භාවිතය අත්හිටුවීමට ජනාධිපති ගෝඨාභය රාජපක්ෂ මහතා ගෙනයන වැඩපිළිවෙල ඉහළින්ම අගය කරන බව පැවසූ ඒ මහතා 1960 දශකයට පෙර පැවති වස විසෙන් තොර කෘෂි සංස්කෘතියට නැවත යායුතු බවත් අවධාරණය කර සිටියි.
එසේම ඒ සඳහා තම තමන්ගේ ගෙවතුවල කුමක් හෝ වගා කරගන්නා ලෙසත් ඒ මහතා සියලු දෙනාගෙන්ම ඉල්ලා සිටියි.
