ටෝකියෝ ඔලිම්පික් උළෙලේදී සියලු වර්ගවල මත්පැන් භාවිතය තහනම් කිරීමට සංවිධායක මණ්ඩලය තීරණය කර තිබෙනවා.
ප්‍රවෘත්ති සාකච්ඡාවකට එක්වෙමින් ටෝකියෝ ඔලිම්පික් සංවිධායක කමිටුවේ සභාපති Seiko Hashimoto පැවසුවේ සුරක්ෂිත ක්‍රීඩා උළෙලක් සඳහා මහජන අවධානය දිනාගැනීම සඳහා මෙම තීරණයට එළැඹි බවයි.
සංවිධායක මණ්ඩලයේ තීරණය සමග ටෝකියෝ ඔලිම්පික් උළෙලේ ප්‍රධාන අනුග්‍රාහක සමාගමක් වන Asahi Breweries එකඟ වූ බවද සංවිධායක මණ්ඩල සභාපතිනිය වැඩිදුරටත් සඳහන් කළා.
ඒ අනුව මෙවර ඔලිම්පික් උළෙලේ තරග ඉසව් පැවැත්වෙන ඕනෑම ස්ථානයක මත්පැන් අලෙවිය සහ පානය කිරීම තහනම් වනු ඇති.
මත්පැන් භාවිතය මගින් කොරෝනා වෛරසය පැතිරීමට හේතුවන සමාජ දුරස්ථභාවය අවම වීම, තැබෑරුම් හා අවන්හල්වල එක්රැස්වීම වැනි තත්ත්වයන් දිරිගැන්වන බවට සෞඛ්‍ය විශේෂඥයින් කරන ලද අනතුරු ඇඟවීම් සැලකිල්ලට ගෙන මේ වන විටත් ටෝකියෝ සහ ඒ අවට මත්පැන් අලෙවිය සීමා කර තිබෙනවා.
