තමාගේ පුතාට දඬුවම් නියම කර ඇත්තේ පසුගිය රජයේ දේශපාලන කුමන්ත්‍රණයක ප්‍රතිඵලයක් ලෙස බව මරණ දඬුවම නියම වී සිටින හිටපු පාර්ලිමේන්තු මන්ත්‍රී දුමින්ද සිල්වාගේ පියා වන ප්‍රේමලාල් සිල්වා, දේශපාලන පළිගැනීම් පිළිබඳ විමසන ජනාධිපති කොමිසම හමුවේ සාක්ෂි දෙමින් පවසා ඇති බව වාර්තා වේ.
එසේ පවසා ඇත්තේ නොවැම්බර් 17 වන දින දේශපාලන පළිගැනීම් පිළිබඳ විමසන ජනාධීපති කොමිසන් සභාවේදීය.
හිටපු පාර්ලිමේන්තු මන්ත්‍රී භාරත ලක්ෂ්මන් ප්‍රේමචන්ද්‍ර ඇතුළු පුද්ගලයන් සිව් දෙනකු ඝාතනය කිරීමේ සිද්ධියට අදාළව වරදකරු වී මරණ දඬුවම නියම වී සිටින දුමින්ද සිල්වා, දේශපාලනික වශයෙන් පළිගැනීමකට ලක්ව ඇතැයි සඳහන් කරමින්, ඔහුගේ පියා වන ප්‍රේමලාල් සිල්වා ඉකුත් 13 වැනිදා දේශපාලන පළිගැනීම් පිළිබඳ විමසන ජනාධිපති කොමිසම වෙත දිවුරුම් ප්‍රකාශයක් මගින් පැමිණිල්ලක් ඉදිරිපත් කර තිබුණි. ඒ අනුව එම පැමිණිල්ලට අදාළව ජනාධිපති කොමිසමේ පොලිස් ඒකකය ප්‍රේමලාල් සිල්වාගෙන් ප්‍රකාශයක් සටහන් කරගෙන ඇත.
කෙසේ වෙතත් මෙම කොමිසන් සභාව ජනාධිපතිවරයා පත් කරන ලද්දේ යහපාලන ආණ්ඩුව සමයේ දේශපාල පළිගැනීම් වලට ලක්වු රාජ්‍ය නිලධාරීන්ගේ පැමිණිලි මේ හරහා භාරගෙන, ඒවා සම්බන්ධයෙන් විමර්ෂනය කිරීමටය. එහෙත් මරණ දඩුවමට නියම වී සිටින දුමින්ද සිල්වා මහතා රාජ්‍ය නිලධාරීයෙක් නොව, හිටපු පාර්ලිමේන්තු මන්ත්‍රිවරයෙක් පමණි.
මෙම පැමිණිල්ලේ වගඋත්තරකරුවන් ලෙස හිටපු ඇමැති රන්ජන් රාමනායක, කොළඹ මහාධිකරණ විනිසුරුවරියක ලෙස කටයුතු කළ පද්මිණී රණවක ගුණතිලක, අපරාධ පරීක්ෂණ දෙපාර්තමේන්තුවේ හිටපු අධ්‍යක්ෂ ශානි අබේසේකර සහ පොලිස් පරීක්ෂක නිශාන්ත සිල්වා කර ඇත.
