තමන් වෙත භාරවූ ඇෆ්ගනිස්තාන හමුදා සාමාජිකයන් 22 ක් ඝාතනය කිරීම හරහා තලේබාන් සංවිධානය යුද අපරාධ සිදුකර ඇතැයි චෝදනාවක් එල්ල වී තිබේ.
ඇම්නෙස්ටි ඉන්ටර්නැෂනල් සංවිධානය සදහන් කරන්නේ තමන්වෙත භාරවන ප්‍රතිවාදී සටන්කරුවන් ඝාතනය කිරීම අන්තර්ජාතික යුද සහ මානුෂීය නීතින්ට පටහැනි බවයි.
පසුගියදා උතුරු ඇෆ්ගනිස්තානයේ ෆර්යාබ් පළාතේ දවාල්ට් අබාඩ් ප්‍රදේශයේ දී තමන් වෙත භාරවූ ඇෆ්ගනිස්තාන කොමාන්ඩෝ සෙබලුන් 22ක් තලේබාන් සංවිධානය විසින් ඝාතනය කර ඇති බව මේ වනවිට තහවුරු වී තිබේ.
මේ වනවිට ඇෆ්ගනිස්තානයේ ගැටුම් උග්‍රවෙමින් ඇති අතර විදෙස් මාධ්‍ය වාර්තා කරන්නේ තලේබාන් සංවිධානය විසින් ඉදිරියේද දරුණු යුද අපරාධ සිදුකිරීමේ ඉඩකඩ පවතින බවයි.
මෙම තත්වය වළක්වාලීම සම්බන්ධයෙන් අවධානය යොමු කරන්නැයි ඇම්නෙස්ටි ඉන්ටර්නැෂනල් සංවිධානය අදාළ සියලු පාර්ශව වෙත අවධාරණය කර තිබේ.
