ගුරුවරුන් හා විදුහල්පතිවරුන් පාසල්වලට කැඳවීමට අධ්‍යාපන අමාත්‍යාංශයේ ලේකම්වරයා චක්‍රලේඛයක් නිකුත් කළද වෘත්තීය ක්‍රියාමාර්ගයේ නිරත ගුරු – විදුහල්පතිවරුන් පාසල්වලට පැමිණීමෙන් වැලකී සිටින බව ලංකා ගුරු සංගමය පවසනවා.
එම සංගමයේ ලේකම් ජෝසප් ස්ටාර්ලින් මහතා පවසන්නේ ගුරුවරුන් හා විදුහල්පතිවරුන් මේ වන විටත් ඉල්ලීම් කිහිපයක් මුල්කරගනිමින් වෘත්තීය ක්‍රියාමාර්ගයක නිරතව සිටින බැවින් කිසිදු ගුරුවරයෙකු හෝ විදුහල්පතිවරයෙකු පාසලට පැමිණීම සිදු නොකල යුතු බවයි.
ඊඩී/09/12/06/01/02/2021 හා 2021.08.01 දිනැති ලිපියෙන් දක්වා තිබුණේ රාජ්‍ය සේවා පළාත් සභා හා පළාත් පාලන අමාත්‍යාංශ ලේකම්වරයාගේ 02/2021(111) හා 2021.07.30 දිනැතිි චක්‍රලේඛයේ උපදෙස් අනුව සියලුම පාසල්වල අධ්‍යයන හා අනධ්‍යන කාර්ය මණ්ඩල කටයුතු කළ යුතු බවයි.
කෙසේ වෙතත් ගුරු විදුහල්පති වෘත්තීය සමිති සන්ධානය අධ්‍යාපන අමාත්‍යාංශයේ ලේකම්වරයාට ලිපියක් යොමුකරමින් සදහන් කර ඇත්තේ මේ වන විටත් ගුරු – විදුහල්පති වැටුප් විෂමතා ඉවත් කිරීමට බලකරමින් සියලු ගුරු – විදුහල්පතිවරු නිරතව සිටින වෘත්තීය ක්‍රියාමාර්ගය පිළිබදව අධ්‍යාපන අමාත්‍යාංශයේ ලේකම්වරයාව දැනුවත් කර ඇති බවයි.
එමෙන්ම 2021.08.03 වන දින අධ්‍යාපන අමාත්‍යවරයා පවත්නා තත්ත්වය පිළිබදව ගුරු – විදුහල්පති වෘත්තීය සමිති සමඟ සාකච්ඡා කිරීමට නියමිතව තිබෙන තත්ත්වයකදී මෙම චක්‍රලේඛය නිකුත් කර ඇති බවයි.
එම නිසා කිසිදු ගුරුවරයෙකු හෝ විදුහල්පතිවරයෙකු පාසලට නොයායුතු බවත් එම ගුරුවරුන් හා විදුහල්පතිවරුන් වෙනුවෙන් ගුරු විදුහල්පති වෘත්තීය සමිති සන්ධානය පෙනී සිටින බවත් ඔවුන් සදහන් කරනවා.
