පාස්කු විමර්ශන සම්බන්ධව ඇතැමුන්ට හදිස්සියක් ඇතත් එය හොඳ හදිස්සියක් නොවන බවට ඉඩම් අමාත්‍ය එස්. එම්. චන්ද්‍රසේන මහතා පවසනවා.
පාස්කු ප්‍රහාරය සම්බන්ධයෙන් යුක්තිය ඉටු නොවීමට විරෝධය පළ කරමින් කතෝලික සභාව විසින් දීප ව්‍යාප්තව පැවැත්වූ කළුකොඩි විරෝධතාව පිළිබඳ ප්‍රතිචාර දක්වමින් අමාත්‍යවරයා මේ බව ප්‍රකාශ කර සිටියේ පෙරේදා (21) දින අනුරාධපුර ප්‍රදේශයේ පැවති මාධ්‍ය හමුවක් අමතමින්.
කළුකොඩි දමා විරෝධතා පැවැත්වුත් නැතත් ජනාධිපතිවරයා විසින් ප්‍රස්කු ප්‍රහාරයට සම්බන්ධ පුද්ගලයන්ට ඉතාම තදින් නීතිය ක්‍රියාත්මක කරන බවයි ඔහු පවසන්නේ.
එමෙන්ම, රජයක් හැටියට ජනාධිපතිවරයා විසින් ආරක්ෂක අංශවලට, බුද්ධි අංශවලට සහ අපරාධ අංශයේ පොලිස් නිලධාරීන්ට නිවැරදිවම වැරදිකාරයින් සොයාගන්නා ලෙසට උපදෙස් දී ඇති බවත් දැනට දෙතුන් සීයක පමණ පිරිසක් රිමාන්ඩ් ගත කර ඇති බවත් හිටපු කැබිනට් අමාත්‍යවරයෙක් පවා රිමාන්ඩ් ගත කර ඇති බවත් ඔහු පෙන්වා දෙනවා.
පාස්කු ඉරුදින ත්‍රස්ත ප්‍රහාරයට යුක්තිය ඉටුනොවීමට විරෝධය පළකරමින් පෙරේදා (21) දින සෑම නිවසකම කළුකොඩි ඔසවන ලෙස අගරදගුරු පදවිය මහජනතාවගෙන් ඉල්ලීමක් සිදුකරා.
පාස්කු ඉරුදින ප්‍රහාරයට වගකිවයුත්තන්ට එරෙහිව දැනට ගෙන ඇති නෛතික ක්‍රියාමාර්ග පිළිබඳ සෑහීමකට පත්නොවන බව පවසමින් කතෝලික සභාව ඉකුත් ජුලි මස ජනාධිපතිවරයාට පිටු 19 කින් යුත් ලිපියක් ද යොමුකර තිබුණා.
ඒ අනුව, ප්‍රහාරයට වගකිවයුතු අය නිසි ලෙස මෙතෙක් හෙළිදරව් කිරීමට රජය අපොහොසත්වීම හේතුවෙන් කතෝලික සභාව විසින් මෙසේ දිවයින පුරා කළුකොඩි එසවීමට තීරණය කරනු ලැබුවා.
