මෙරට කොරෝනා ව්‍යාප්තිය පාලනයට නිසි ක්‍රමවේදයක් අනුගමනය නොකළහොත් දෛනික කොවිඩ් මරණ ගණන 400 සීමාවට පැමිණීම නොවැළැක්විය හැකි වනු ඇති බවට රජයේ වෛද්‍ය නිලධාරීන්ගේ සංගමය පවසනවා
එම සංගමයේ විධායක සභික වෛද්‍ය ප්‍රසාද් කොළඹගේ මහතා පවසන්නේ පවතින නිරෝධායන ඇඳිරි නීතිය යටතේ සංචරණ සීමා 90%කට වඩා ක්‍රියාත්මක වුවහොත් එහි අපේක්ෂිත ප්‍රතිඵල ලබා ගත හැකි වනු ඇති බවත් එසේ නොවුණහොත් දින 10ක් නොව මාස ගණනක් වුවද රට වසා දැමීමට සිදුවනු ඇති බවත් ය.
තවද, මේ වන විට වාර්තා වන දෛනික මරණ ගනන 200 සීමාවට පැමිණ ඇති බවත් නිසි ක්‍රමයකට අනුව එය මෙම වසංගතය පාලනය නොකළොත් මෙම තත්ත්වය උදා වන බව රජයේ වෛද්‍ය නිලධාරීන්ගේ සංගමය විසින් මීට සති කිහිපයකට පෙරම පෙන්වා දුන් බවත් කොළඹගේ මහතා පවසනවා.
මිය යන බහුතරය එන්නත් දෙකම ලබා නොගත් ජ්‍යෙෂ්ඨ පුරවැසියන් බවට පසුගිය මාධ්‍ය සාකච්ජාවකදී යුද හමුදාපතිවරයා ප්‍රකාශ කළ බවත් මෙරට එන්නත්කරණ ක්‍රියාවලියේ ප්‍රමුඛතාව නිසි ආකාරව ක්‍රියාත්මක වී නොමැති බව ඒ හරහා පෙන්නුම් කෙරෙන බවත් ඔහු පවසනවා. අපේක්ෂිත අරමුණු ඉටුකර ගත හැකිවන්නේ සෞඛ්‍ය අංශවල උපදෙස් අනුව ක්‍රියා කළහොත් පමණක් බවයි ඔහු වැඩිදුරටත් අවධාරණය කර සිටින්නේ.
