රජයේ ආයත සතු ධාවනය කළ නොහැකි තත්ත්වයේ පවතින වාහන 5,533 ක් අතරින් අලුත්වැඩියා කළ හැකි වාහන කඩිනමින් අලුත්වැඩියා කර ප්‍රයෝජනයට ගැනීමටත්, අලුත්වැඩියා කළ නොහැකි වාහන විධිමත් ක්‍රමවේදයකට අනුව අපහරණය කිරීමටත් කැබිනට් මණ්ඩලය තීරණය කර තිබේ.
ඒ, අග්‍රාමාත්‍ය මහින්ද රාජපක්ෂ මහතා විසින් අමාත්‍ය මණ්ඩලයට ඉදිරිපත් කළ යෝජනාවකට අනුවයි.
මේ වන විට අමාත්‍යංශ, රජයේ ආයතන, රාජ්‍ය ව්‍යාපාර සහ පළාත් සභා හා පළාත් පාලන ආයතන සතුව වාහන 82,194 ක් පවතියි.
ඒ අතුරින් වාහන 76,661 ක් ධාවන තත්ත්වයේ පවතින අතර වාහන 5,533 ක් ධාවනය කළ නොහැකි තත්ත්වයේ පවතින බව එම වාර්තාව ඉදිරිපත් කරමින් අග්‍රාමාත්‍යවරයා සඳහන් කර ඇත.
එමෙන්ම ම රාජ්‍ය ආයතනවල ජේෂ්ඨ නිලධාරින් 8,500 ක ට පමණ මාසික දීමනාවක් ලබා දී ඔවුන්ගේ පෞද්ගලික මෝටර් රථ නිල ප්‍රවාහන පහසුකම් පිණිස යොදා ගැනීමටත් රජයේ අනුමැතියය ලබා දී ඇති බව මෙම වාර්තාවේ සඳහන්.
ඒ අනුව අග්‍රාමාත්‍යවරයා විසින් ඉදිරිපත් කරන ලද තොරතුරු සැලකිල්ලට ගෙන දැනට ධාවන තත්ත්වයේ නොමැති වාහන අතුරින් අලුත්වැඩියා කළ හැකි වාහන වහාම අලුත්වැඩියා කර ප්‍රයෝජනයට ගැනීමටත් එලෙස අලුත්වැඩියා කළ නොහැකි වාහන විධිමත් ක්‍රමවේදයක් අනුගමනය කරමින් නොපමාව අපහරණය කිරීමටත් අමාත්‍ය මණ්ඩලය තීරණය කර තිබේ.
