පොලොන්නරුව පරාක්‍රම සමුද්‍රයේ වැව් බැම්මේ ආරක්‍ෂාවට යොදා තිබෙන රළපනාවේ කලුගල් ආදිය ඉවත් කර ඇවිදින මංතීරුවක් ඉදිකිරීමට වාරිමාර්ග දෙපාර්තමේන්තුව සූදානම් වන බවට තොරතුරු වාර්තා වනවා.
පරාක්‍රම සමුද්‍රය ව්‍යාපාර ගොවි සංවිධානයේ සභාපති හා පොලොන්නරුව දිස්ත්‍රික් ඒකාබද්ධ ව්‍යාපාර ගොවි සංවිධානයේ සභාපති ජගත් අරුණ කීර්ති මහතා ප්‍රකාශ කරන්නේ පරාක්‍රම සමුද්‍රයේ ප්‍රධාන සොරොව්වේ සිට දෙකේ ඇල සොරාව්ව පසුකර දිසාපති නිල නිවස පිහිටා තිබෙන ස්ථානයට ආසන්නය තෙක් මෙම ඇවිදින මං තීරුව ඉදිකිරීමට සැලසුම් කර තිබෙන බවයි.
මේ සම්බන්ධයෙන් ප්‍රදේශයේ ගොවි ජනතාව විරෝධය පලකර ඇතත් එය නොතකා අදාළ ඉදිකිරීම සිදුකෙරෙන බවයි වාර්තා වන්නේ.
අදාළ චෝදනාව සම්බන්ධයෙන් විමසීමේදී පරාක්‍රම සමුද්‍රය වාරිමාර්ග ඉංජිනේරු අසේල උදයංග මහතා පැවසුවේ නාගරික සංවර්ධන අධිකාරියේ ඉල්ලීමකට අනුව එම ආයතනයේ රුපියල් මිලියන 34ක වියදමින් මෙම ඇවිදින මංතීරුව ඉදිකරන බවයි.
කිලෝමීටර 1.7 කින් යුත් මෙම ඇවිදින මංතීරුව මෙම දෙසැම්බර් මාසය අවසන්වීමට පෙර ඉදිකර ජනතා අයිතියට පත්කරන බව ඒ මහතා වැඩිදුරටත් සදහන් කළා.
