IS සංවිධානය කාබුල් ගුවන් තොටුපොළ ඉලක්ක කරගෙන ත්‍රස්ත ප්‍රහාරයක් එල්ල කරනු ඇතැයි ඇමෙරිකා එක්සත් ජනපදය ඇතුළු බටහිර රටවල් අනතුරු අඟවා තිබෙනවා.
අයි.එස්. සංවිධානය කාබුල් අගනුවර ගුවන් තොටුපොළට ප්‍රහාරයක් එල්ල කරනු ඇති බවට විශ්වාසනීය තොරතුරු ලැබී ඇතැයි ද එබැවින් හැකිතාක් ගුවන් තොටුපොළින් ඈත්වන්නැයි ද ඇමෙරිකාව සහ අනෙකුත් බටහිර රටවල් සිය පුරවැසියන්ට මෙන්ම ඇෆ්ගන් වැසියන්ට ද අනතුරු අඟවා ඇති බවයි වාර්තා වන්නේ.
ඇමෙරිකානු ඇතුළු බටහිර රටවල වැසියන්, රාජ්‍ය තාන්ත්‍රිකයන් මෙන්ම ඇෆ්ගන් වැසියන් මුදාගැනීම සඳහා තලේබාන් සංවිධානය අගෝස්තු 31 වැනිදා දක්වා එම රටවලට කල් දී තිබෙනවා.
මේ නිසා බටහිර හමුදා මුදාගැනීමේ මෙහෙයුම් වේගවත් කර තිබුනද අවසාන දිනය ඉක්මවා ඇෆ්ගනිස්තානයේ රැඳී සිටියහොත් නරක ප්‍රතිවිපාකවලට මුහුණ දීමට සිදුවනු ඇතැයි ද තලේබාන් සංවිධානය අනතුරු අඟවා ඇති බව වාර්තා වනවා.
මේ නිසා ඇමෙරිකාව ඇතුළු බටහිර රටවලට දැඩි පීඩනයක් එල්ල වී තිබේ.
