කාබුල් අගනුවරට තවත් ප්‍රහාර එල්ලවේ යැයි අනතුරු ඇඟවීමක්

කාබුල් අගනුවර තවත් ප්‍රහාර එල්ල වනු ඇතැයි ඇමෙරිකානු බුද්ධි අංශ අනතුරු අඟවයි.

ඇෆ්ගනිස්තානයේ කාබුල් අගනුවරට බ්‍රහස්පතින්දා පස්වරුවේ එල්ල වූ ප්‍රහාරවලින් මියගිය සිවිල් වැසියන්ගේ ගණන මේ වනවිට 85 දක්වා ඉහළ ගොස් තිබේ.

මෙම ප්‍රහාරවලින් ඇමෙරිකානු සොල්දාදුවෝ 13 දෙනෙක් ද මියගියහ.

අයි.එස්. සංවිධානයේ අයි.එස්. කේ. ශාඛාව මෙම ප්‍රහාරවල වගකීම බාරගෙන තිබෙන අතර ගුවන් තොටුපොළ ආසන්නයේ මරාගෙන මැරුණු බෝම්බ ප්‍රහාර දෙකක් සහ වෙඩි තැබීමක් සිදුව ඇතැයි දැනට වාර්තා වේ.

කාබුල් නුවරට එල්ල වූ ප්‍රහාරවලින් ඇෆ්ගන් වැසියන් 72 දෙනකු මියගොස් ඇතැයි ද, තලේබාන් සංවිධානයේ සාමාජිකයන් 28 දෙනකු මියගොස් ඇතැයි ද සෞඛ්‍ය අංශ පවසයි.

ප්‍රහාරයෙන් මියගිය සහ තුවාල ලැබූවන් සම්බන්ධයෙන් මේ වනවිට විදෙස් මාධ්‍ය විවිධ සංඛ්‍යා ඉදිරිපත් කර ඇති අතර කාබුල් නුවර අස්ථාවරත්වය හේතුවෙන් තත්ත්වය උග්‍ර අතට හැරී තිබේ.

තලේබාන් සංවිධානයේ සාමාජිකයන් 28 දෙනකු මියගොස් ඇති බවට පළ වූ වාර්තා ප්‍රතික්ෂේප කරන බව තලේබාන් සංවිධානයෙන් ප්‍රකාශකයෙක් පසුව පැවැසීය.

ගුවන් තොටුපොළේ ආරක්ෂාවට යොදවා සිටි කිසිදු ආරක්ෂකයකු මිය නොගිය බව ද ඔහු කීය.
සිය හමුදා භටයන් 13 දෙනකු මියගිය බව ඇමෙරිකානු හමුදා ප්‍රකාශ කළේය.