‘TV Derana’ Youtube නාළිකාවේ සියලු වීඩියෝ හැකර්වරුන් මකා දමලා. නමත් වෙනස් කරලා

දෙරණ මාධ්‍ය ජාලයට අයත් ‘TV Derana’ නිල Youtube නාළිකාවේ මෙතෙක් කලක් තිබූ සියලුම වීඩියෝ එය තම ග්‍රහණයට ගත් හැකර්වරුන් විසින් මකා දමා තිබෙනවා.

ඒ අනුව මේ වන විට එහි ඇත්තේ හැකර්වරුන් පාලනයට ගත් පසුව විකාශය වන සජීවී වැඩසටහන පමණයි.

එමෙන්ම එම Youtube නාළිකාවේ නමද මේ වන විට වෙනස් කොට ‘TV Derana’වෙනුවට ‘Crypto News’ ලෙස යොදා තිබෙනවා.

කෙසේ වෙතත් Youtube සමාජ මාධ්‍යය තුළ ‘TV Derana’ Youtube නාළිකාවේ පලකර තිබූ නාට්‍ය හෝ සංගීත වැටසටහන් පිරික්සීමේදී (Search) එම නාට්‍ය හෝ වැඩසටහන් නොමැති වුවත් ‘TV Derana’ Youtube නාළිකාවේ Playlist පිරික්සීමේදී එම වීඩියෝ තවදුරටත් Unlisted තත්ත්වයෙන් දක්නට ලැබෙනවා.

අද (29) පස්වරුවේ පටන් ‘TV Derana’Youtube නාළිකාවට හැකර් ප්‍රහාරයක් එල්ලවී ඇති අතර එම ප්‍රහාරය පිළිබදව දෙරණ මාධ්‍ය ජාලයේ හිමිකරු වන දිලිත් ජයවීර මහතාද ෆේස්බුක් සටහනක් තබා තිබුණා.

‘TV Derana’ Youtube නාළිකාව භාරව කටයුතු කරන කළමණාකරුගේ Gmail ලිපිනයද මේ වන විට හැකර්වරුන් සිය භාරයට ගෙන තිබෙන බවයි වාර්තා වන්නේ.

‘TV Derana’ Youtube නාළිකාව හැකර් ප්‍රහාරයට ලක්වන විටත් එය සතුව මිලියන 3 කට අධික ග්‍රාහකයන් (Subscribers)ප්‍රමාණයක් සිටීමද විශේෂත්වයක්.

කෙසේවෙතත් මෙම ක්‍රියාව පිළිබදව සමාජ මාධ්‍ය තුළ මිශ්‍ර අදහස් පළවනවා.

ඇතැමෙකු මේ පිළිබදව අදහස් දක්වමින් පවසන්නේ මෙය දෙරණ ආයතනය තුළින්ම සිදුකරන ලද ක්‍රියාවක් ලෙසයි.