ඇෆ්ගනිස්තානයේ පසුගිය පාලන සමය තුළ පොලිස් නිළධාරිනියන් ලෙස කටයුතු කළ කාන්තාවන්ගේ ජීවිත ආරක්ෂාව සම්බන්ධයෙන් බරපතල ගැ‍ටලුවක් මතුව ඇතැයි වාර්තා වේ.
මේ පිළිබද තොරතුරු අනාවරණය වී ඇත්තේ නෙදර්ලන්ත පොලිසිය විසින් එරට රජයට ඉදිරිපත් කළ ඉල්ලීමක් හේතුවෙනි.
ඇෆ්ගනිස්තානයේ නේටෝ හමුදා රැදී සිටින කාලය තුළ එරට කාන්තා පොලිස් සේවයක් ස්ථාපිත කෙරුණු අතර ඔවුන්ට අවශ්‍ය පුහුණුව සහ සහය ලබාදීමේදී නෙදර්ලන්ත පොලිසිය විශේෂ සහය දැක්වීමක නිරත විය.
ඒ අනුව නෙදර්ලන්තයේ සහ ඇෆ්ගනිස්තානයේ පොලිස් නිලධාරිනියන් අතර විශේෂ සබදකම් පවතින අතර ඒ හරහා අනාවරණය වී ඇත්තේ තලේබාන් පාලනය විසින් මේ වනවිට සේවය අහිමි කරනු ලැබ සිටින පොලිස් නිලධාරිනියන්ට ජීවිත ආරක්ෂාව සම්බන්ධයෙන් ද ගැටලු මතුව ඇති බවයි.
ගතවූ කාලසීමාවේදී ඇෆ්ගනිස්තාන පොලිසියේ සේවය කළ නිලධාරිනියන් සිව්දෙනෙකු පමණ ඝාතනයට ලක්ව ඇති අතර තවත් විශාල පිරිසක් ජීවිතාරක්ෂාව සදහා සැඟව සිටින බව හෙළිවී තිබේ.
කෙසේවෙතත්, ඔවුන් පිළිබද වන දත්ත පද්ධතියට ඇතුළුවීමට තලේබාන් සංවිධානයට අවස්ථාව ලැබී ඇති හෙයින් මෙම පිරිස් මුදාගැනීම සදහා අන්තර්ජාතික මැදිහත්වීමක් සිදුකරන ලෙස නෙදර්ලන්ත පොලිසිය එරට රජයෙන් ඉල්ලා ඇති බව වැඩිදුරටත් වාර්තා වේ.
