සිව්දින නිල සංචාරයක් සඳහා දිවයිනට පැමිණ සිටින ඉන්දීය විදේශ ලේකම් ශ්‍රී හර්ෂ් වර්ධන් ෂ්‍රිංග්ලා මහතා ඊයේ (03) මහනුවර ශ්‍රී දළදා මාළිගාවට ගොස් දළදා සමිඳුන් වැඳ ආශිර්වාද ලබාගත් අතර අනතුරුව ත්‍රිකුණාමලය තෙල් ටැංකි සංකීර්ණය නිරීක්ෂණය කරන ලදි.
ඉන් පසුව ඉන්දිය විදේශ ලේකම්වරයා යාපනය බලා පිටත්ව ගිය අතර උතුරේ දේශපාලන නියෝජිතයින් ද හමුවී සාකච්ඡාවක නිරත වී තිබුණි. පසුව ඔහු ඉන්දීය ප්‍රදාන යටතේ ඉදිකළ යාපනය සංස්කෘතික මධ්‍යස්ථානයේ නිරීක්ෂණ චාරිකාවකට එක් විය.
එහිදී මාධ්‍ය වෙත අදහස් දක්වමින් ඒ මහතා සඳහන් කළේ යාපනයේ උසස් සංස්කෘතික උරුමය බෙදා හදා ගැනීමට හැකිවනු ඇති බව තමා විශ්වාස කරන බවයි.
ඉන්දීය රජයේ ඩොලර් මිලියන 11කට වැඩි ප්‍රදානයක් ලෙස ඉදිකළ සංස්කෘතික මධ්‍යස්ථානය සංස්කෘතික උරුමය කෙරෙහි අනුග්‍රහය දැක්වීම හා ආරක්ෂා කිරීමට ඉන්දීය රජයට ඇති බැඳීම වැඩි කරගැනීමේ සංකේතය බවත් යාපනය සංස්කෘතික මධ්‍යස්ථානය විවෘත කිරීමේ දිනය කඩිනමින් නිවේදනය කිරීමට බලාපොරොත්තු වන බවත් ඔහු වැඩිදුරටත් පවසා සිටියා.
ඉන්දීය විදේශ ලේකම්වරයා මෙරට ඉන්දීය මහ කොමසාරිස් ගෝපාල් බග්ලේ සමග උතුරේ දේශපාලන නියෝජිතයින් යාපනය තිරනල්වේලීහිදී හමුවී සිදුකළ සාකච්ඡාවට උතුරු පළාත් ආණ්ඩුකාර පී.එස්.එම්. චාර්ල්ස් මහත්මිය, උතුරු පළාත් සභාවේ සභාපති සී.වී.කේ. සිවඥානම්, දෙමළ ජාතික මහජන පෙරමුණේ නායක ගජේන්ද්‍ර කුමාර් පොන්නම්බලම්, උතුරු පළාත් සභා හිටපු මන්ත්‍රී එම්.කේ. සිවාජිලිංගම්, ඊ.පී.ආර්.එල්.එෆ්. නායක සුරේෂ් ප්‍රේමචන්ද්‍රන් යන පිරිස එක්වී ඇති බවයි වාර්තා වන්නේ.
