රාජකාරියට පැමිණෙමින් සිටි අඹන්පොළ දකුණ ග්‍රාම නිලධාරීවරයා කපා කොටා ඝාතනය කළ සිද්ධියට අදාළව ගල්ගමුව පොලිසිය විසින් ඊයේ (04) රාත්‍රීයේ දුම්රිය ස්ථානාධිපතිවරයකු අත්අඩංගුවට ගෙන තිබෙනවා.
පොලිසිය පවසන්නේ ඉඩම් ආරවුලක් හේතුවෙන් මෙම ඝාතනය සිදුකර ඇති බවට මෙතෙක් කර ඇති විමර්ශන ඔස්සේ කරුණු හෙළිදරව් වී ඇති බවයි.
ග්‍රාම නිලධාරීවරයා බිය වැද්දීමට යැයි සඳහන් කරමින් සැකකාර දුම්රිය ස්ථානාධිපතිවරයා රුපියල් ලක්ෂ එක හමාරක මුදලකට කොන්ත්‍රාත්තුවක් හික්කඩුව ප්‍රදේශයේ පදිංචි පුද්ගලයකුට ලබාදී ඇතැයි වාර්තා වේ .
ඒ අනුව මෙම ඝාතන සිද්ධියේ ප්‍රධාන සැකකරු සොයා විමර්ශන ආරම්භ කර ඇතැයි පොලිසිය සඳහන් කරයි.
කිසියම් පිරිසක් විසින් අඹන්පොළ දකුණ ග්‍රාම නිලධාරීවරයා ලෙස කටයුතු කළ එස්.එම්. සපුකුමාර නමැති 51 හැවිරිදි තිදරු පියෙක් කපාකොටා ඝාතනය කර තිබුණේ ඊයේ (04) පෙරවරුවේදියි.
රාජකාරි සඳහා යමින් සිටින අතරතුර වෑන් රථයකින් පැමිණි පිරිසක් අනුරාධපුර උදංගාව ප්‍රදේශයේදී ඔහුව කපාකොටා තුවාල සිදුකර පළාගොස් තිබුණා.
බරපතළ තුවාල ලැබූ ග්‍රාම නිලධාරීවරයාව රෝහල්ගත කිරීමට ප්‍රදේශවාසීන් පියවර ගත්තත් රෝහලට රැගෙන එන විටත් ඔහු මියගොස් සිට තිබෙනවා.
