රජය ඉන්ධන මිල වැඩි කිරීමට කටයුතු කළහොත් බස් ගාස්තුද වැඩි කිරීමට සිදුවන බව බස් සංගම් පවසනවා.
කොවිඩ් වසංගතය මධ්‍යයේ, වර්තමානයේ බස් කර්මාන්තය අභියෝග රැසක් මත ක්‍රියාත්මක වන බවයි ඔවුන් පෙන්වා දෙන්නේ.
ඉන්ධන මිල ඉහළ යාමේ අවදානමක් ඇති බැවින් ඉදිරියේදී බස් ගාස්තු සංශෝධනයක් සිදුකිරිමට සිදුවෙනු ඇති බවයි ලංකා පෞද්ගලික බස්රථ හිමියන්ගේ සංගමයේ සභාපති ගැමුණු විජේරත්න මහතා පවසන්නේ. මේ වන විටද බස් ධාවනය සිදුවන්නේ 30%ක් පමණක් බවත් එමෙන්ම, අදාළ අමතර කොටස් සහ ටයර් මිලද කැපී පෙනෙන ලෙස ඉහළ ගොස් ඇති බවත් ඔහු පෙන්වා දෙනවා.
මේ අතර, ඉන්ධන මිල ඉහළ ගියහොත් පොදු ප්‍රවාහන ක්ෂේත්‍රය බරපතළ ගැටළුවකට මුහුණ දෙනු ඇති බවයි ප්‍රවාහන රාජ්‍ය අමාත්‍ය දිලුම් අමුණුගම මහතාද පවසන්නේ.
කෙසේ වෙතත්, ඉන්ධන මිල ඉහළ දැමීමට මේ වන තුරුත් රජය තීරණයක් ගෙන නොමැති බවත් පසුගිය අවස්ථාවේ ඉන්ධන මිල ඉහළ දැමීමෙන් පසු බස් හිමියන් සමග සාකච්ජාකොට ගාස්තු සංශෝධනයකට නොගොස් සිටි බවත් අමාත්‍යවරයා පවසා සිටිනවා.
යම් හෙයකින් ඉන්ධන මිල වැඩි කිරීමට තීරණය කළත් ඩිසල් මිල වැඩි නොකර එම පාඩුව රජය විසින් දරාගැනීමක් සිදුකොට බස් ගාස්තු ඉහළ යාම වැළැක්වීමට උත්සහ දරන බවයි මෙහිදී රාජ්‍ය අමාත්‍යවරයා ප්‍රකාශ කර සිටියේ.
මේ අතර ඉන්ධන මිල වැඩි කිරීමට රජය කටයුතු කළහොත් පාසල් ආරම්භ වීමෙන් පසු පාසල් ළමුන් ප්‍රවාහනය කරන වෑන්රථ සේවාවල ගාස්තු ද ඉහළ නංවන බවයි සංමස්ථ ලංකා පාසල් ළමුන් ප්‍රවාහන සංගමයේ සභාපති එල් මල්ශ්‍රී ද සිල්වා පවසන්නේ.
