කොළඹ අහස සිපගන්නා විස්මිත නිර්මාණයක් වූ අල්ටෙයාර් ගොඩනැගිල්ල ඉන්දීය මහකොමසාරිස් ගෝපාල් බාග්ලේ සහ අමාත්‍ය නාමල් රාජපක්ෂගේ ප්‍රධානත්වයෙන් ඊයේ (27) විවෘත කෙරුණා.
මහල් 68කින් සමන්විත බහු මහල් මිශ්‍ර සංවර්ධන ව්‍යාපෘතියක් ලෙස ක්‍රියාත්මක මෙම ගොඩනැගිල්ල සියලු පහසුකම්වලින් සමන්විතව අක්කර දෙකක භූමි භාගයක ඉදිකෙර තිබෙනවා.
මෙහි ඇති නිවාස 404 ක් මේ වන විටත් අලෙවි කර අවසන් අතර, ඒවා හිමිකරුවන් වෙත නිල වශයෙන් භාරදීම ඉදිරි සති කිහිපය තුළ දී සිදු කිරීමට නියමිත බවයි පැවසෙන්නේ.
2011 වසරේදී අල්ටෙයාර් මහල් නිවාස ව්‍යාපෘතිය ආරම්භ කිරීම සඳහා ගිවිසුම් අත්සන් කරනු ලැබූවා.
එහි ඉදිකිරීම් කටයුතු 2012 දී ආරම්භ කෙරුණු අතර 2017 වසර වන විට මෙහි ඉදි කිරීම් සියල්ල අවසාන කිරීමට සැලසුම් කළ ද එහි ඉදිකිරීම් අවසාන අදියරට ළඟා වී ඇත්තේ 2020දීයි.
මෙම ව්‍යාපෘතියෙහි ඉදිකිරීම් කටයුතු කරනු ලබන්නේ ඩුබායි හි ඉදිකිරීම් සමාගමක් වන ශපූර්ජි පලංජි (Shapoorji Palanji) නමැති සමාගමකටයි.
එය ඉන්දියානු සමාගමක් වන අතර එහි අන්තර්ජාතික ශාඛා පිහිටා ඇත්තේ ඩුබායිහිය.
කොළඹ 02, සර් ජේම්ස් පීරිස් මාවතේ ගංගාරාම විහාරයට මුහුණලා නවලෝක රෝහලට යාබදව අක්කර දෙකක භූමි භාගයක වර්ග අඩි මිලියන 1.5ක මෙම අසිරිමත් කුලුනු ද්විත්වය ඉදි කර තිබෙනවා.
මීටර් 240ක උසකින් යුක්ත වන මෙම ගොඩනැඟිල්ලෙහි මෙහි අධි සුඛෝපභෝගී නිවාස 404කින් සමන්විතයි
එක් කුලුනක් අනෙක් කුලුන දිශාවට අංශක 13ක ඇලවීමක් සහිතව නිර්මාණය කර තිබීම මෙම ගොඩනැගිල්ලෙහි ඇති විශේෂත්වයයි.
එක් කුලුනක් මහල් 68කින් සමන්විත වන අතර අනෙක් කුලුන මහල් 63කින් සමන්විත වනවා.
මෙම මනස්කාන්ත නිර්මාණයේ නිර්මාතෘ, ඊශ්‍රායල් සහ කැනේඩියානු සම්භවයක් සහිත ලෝක ප්‍රසිද්ධ වාස්තු විශේෂඥයෙකු වන මෝශේ සාෆ්ඩී (Moshe Safdie).
ඇල්ටෙයාර් ගොඩනැගිල්ල මෙරට විශාලතම ඍජු විදේශ ආයෝජන ව්‍යාපෘතිය ලෙසද සැලකෙනවා.
