රුසියානු ජනාධිපති ව්ලැඩිමීර් පුටින්, විදේශීය ගැණුම්කරුවන් තම රටේ ගෑස් සඳහා වන සියලුම ගෙවීම් රූබල්වලින් ගෙවිය යුතු බවට වන නියෝගයකට අත්සන් තබා ඇති අතර ගෙවීම් එසේ සිදු නොකරන සියලුම කොන්ත්‍රාත්තු නතර කරන බව ප්‍රකාශ කර තිබේ.
“කිසිවකු අපට කිසිවක් නොමිලේ විකුණන්නේ නැහැ.අනික අපි පින් කරන්න යන්නෙත් නෑ.එහි තේරුම මෙයට එකඟ නොවන්නෙක් සිටී නම් දැනට පවතින කොන්ත්‍රාත්තු නවත්වන බව” යැයි පුටින් රූපවාහිනි මාධ්‍යය ඔස්සේ පැවසූ බව විදෙස් මාධ්‍යය වාර්තා කරයි.
ගෙවීම් එසේ සිදු නොකළහොත් එය ගැණුම්කරුවන්ගේ පැත්තෙන් පැහැර හැරීමක් ලෙස සලකන බව ද ජනාධිපතිවරයා එහිදී කියා සිටියේය.
රුසියානු ගෑස් විකිණීම සඳහා වන නව නීති “මිත්‍රශීලී නොවන රටවල්” සඳහා අප්‍රේල් පළමුවන දා සිට ක්‍රියාත්මක වන බව ද ඔහු පවසා ඇත.
රුසියාවේ මුදල් ගිණුම් අත්හිටුවූ පසු බටහිරට රුසියානු ගෑස්වලින් කොටසක් නොමිලේ ලැබුණු බව ජනපති පුටින් මෑතක දී සඳහන් කර තිබිණි.
මෙම පියවර ප්‍රතික්ෂේප කරමින් බටහිර සමාගම් සහ ආණ්ඩු පවසා ඇත්තේ දැනට පවතින කොන්ත්‍රාත්තු යටතේ ඩොලර්වලින් සහ යුරෝවලින් ගෙවීම් සිදු කරන බැවින් මෙම නව අදහස කොන්ත්‍රාත්තු කඩ කිරීමක් බවයි.
